Tofiq Abbasov: “Moskvadakı terrorla Azərbaycanda planlaşdırılan terror bir-biri ilə əlaqəli deyil”

“Azərbaycanda planlaşdırılan terror aktında da həmin izlər var. Ümumiyyətlə, bütün dünyada terrorçuların dəsti-xətti, taktikası eynidir”.

Versus.Az xəbər verir ki, bunu Rusiyanın Moskva vilayətində “Crocus City Hall” konsert kompleksində törədilən terror aktı ilə bağlı açıqlamasında siyasi şərhçi Tofiq Abbasov deyib.

T.Abbasov bildirib ki, bu, məqsədli şəkildə əhali arasında xof yaratmaq, insanları düz yoldan yayındırmaq, hakimiyyətə olan etimadı zəiflətməkdən ibarətdir.

T.Abbasov Rusiyada baş vermiş terrorla Azərbaycanda planlaşdırılan terrorun bir-biri ilə əlaqəli olmadığını bildirib. Onun fikrincə, Rusiyada baş verən terrorun qayəsində başqa maraqlar var:

“Həmin terror aktında Ukraynanın, Qərbin izlərini axtarırlar. Ola bilər ki, bizdə planlaşdırılan terror aktında da həmin izlər var. Ancaq burada istədikləri başqa bir şeydir - sabitliyi pozmaq, hərcmərclik yaratmaq və eyni zamanda qələbəmizi həzm edə bilməyən qüvvələrə meydan vermək”.

T.Abbasov hesab edir ki, xarici kəşfiyyat orqanları planlaşdırdıqları terrorla Azərbaycan rəhbərliyinə mesajlar verirlər ki, istədikləri zaman sabitliyi poza bilərlər. Onun sözlərinə görə, amma bu mümkün deyil:

“Dövlət Təhlükəszilik Xidməti və digər güc struktirları əlaqələndirilmiş şəkildə işləyir, bir-birini tamamlayır. Azərbaycan reallığında belə oyunbazlıqlar keçməyəcək. Azərbaycan xüsusi xidmət orqanları artıq bir neçə ölkənin cəsus şəbəkəsni zərərsiləşdirib. Azərbaycan xüsusi xidmət orqanlarının Fransanın cəsus şəbəkəsini zərərsizləşdirməsi yüksək peşəkarlığın göstəricisidir. Bu ondan xəbər verir ki, proseslər aidiyyatı orqanların diqqətindədir. Biz təhlükəsizliyimizi, əldə etdiyimiz qələbəni qorumaqda israrlıyıq. Ona görə də belə planlarla daxildə gedən prosesə müdaxilə edərək sabitliyi poza biləcəklərinə inanmıram. Əgər biz böyük qələbəmizi əldə etməkdə yüksək peşəkarlıq, yeni texnoloji vasitələrin istifadəsini nümayiş etdirə bilmişiksə, deməli bütün proseslərə kompleks şəkildə yanaşa bilirik. İstənilən təhdidin qarşısında hazırlıqlıyıq. Bədnam qüvvələrin istəkləri reallaşmayacaq”.

T.Qafarlı