AzMİU THİK-in üzvləri Quba Soyqırımı Memorial Kompleksində

Azərbaycan Memarlıq və İnşaat Universitetinin (AzMİU) Tələbə Həmkarlar İttifaqı Komitəsinin rəhbərliyi və aktiv tələbələr 31 Mart - Azərbaycanlıların Soyqırımı Gününün 101-ci ildönümü münasibətilə Quba Soyqırımı Memorial Kompleksini ziyarət edib.

Versus.Az-ın məlumatına görə, Faciə qurbanlarının xatirəsini yad edən THİK üzvləri xatirə daşı önünə əklil qoyublar. Daha sonra tələbələrlə birlikdə kompleksi gəzərək soyqırıma həsr olunmuş stendlərlə tanış olublar.

Kompleks rəsmiləri tələbələrə ermənilər tərəfindən azərbaycanlılara qarşı aparılan etnik təmizləmə barədə ətraflı məlumat veriblər. Bildirilib ki, Heydər Əliyev Fondunun dəstəyi ilə yaradılan Quba Soyqırımı Memorial Kompleksi 2013-cü il sentyabrın 18-də açılıb. Nümayəndə heyətinin diqqətinə çatdırılıb ki, Quba soyqırımı məzarlığı 2007-ci il aprelin 1-də ərazidə torpaq işləri görülərkən aşkarlanıb. Bundan sonra Azərbaycan Milli Elmlər Akademiyasının Arxeologiya və Etnoqrafiya İnstitutunun əməkdaşları tərəfindən kütləvi məzarlıqda geniş tədqiqat işləri aparılıb. Tədqiqatlar nəticəsində məzarlığın 1918-ci ildə ermənilərin yerli dinc əhaliyə qarşı törətdikləri soyqırımı ilə bağlı olduğu müəyyən edilib.

Ağanisə Sultanova
Versus.Az