“Türkdilli ölkələrin təhdidlərə qarşı birgə mübarizəsi vacibdir”

“Sovetlərin süqutundan sonra türkdilli dövlətlərin müstəqillik qazanmaları bu ölkələr arasında sıx əlaqələrin qurulmasına ciddi zəmin yaratdı. Ancaq təəssüf ki, bu dövlətlərdən bəzilərinin, daha doğrusu onların liderlərinin mövqeyi çox arzulanan Ümumtürk birliyinin formalaşdırılmasını xeyli gecikdirdir”.

Versus.Az xəbər verir ki, bunu siyasi ekspert Əlabbas Məhərrəmov müəllif yazısında bildirib. 

O qeyd edib ki, son illərdə Azərbaycan və Türkiyənin davamlı səyləri nəticəsində Orta Asiyanın türk dövlətləri ilə inteqrasiya prosesi kifayət qədər sürətlənib. Türkdilli Dövlətlərin Əməkdaşlıq Şurasının və digər birgə strukturların yaradıldığını, onların fəaliyyətinin əlaqələndirilməsini buna misal göstərmək olar:

“Bu günlərdə Bakıda Türkdilli Dövlətlərin Xüsusi Xidmət Orqanları Konfransının iclasının keçirilməsi əməkdaşlıq üçün yeni platformanın möhkəmləndiyini göstərir. Bildiyiniz kimi, xüsusi xidmət orqanları dövlətlərin təhlükəsizlik orqanlarıdır və türkdilli ölkələrin bu müstəvidə əməkdaşlığı təhlükəsizliyin qarşılıqlı surətdə təmin olunması baxımından, çox vacibdir.

İclasda çıxış edən Dövlət Təhlükəsizliyi Xidmətinin rəisi general-leytenant Əli Nağıyevin terrorçuluq, dini ekstremizm, təcavüzkar separatçılıq kimi təhlükələri önə çəkməsi, türkdilli dövlətlərin bu təhdidlərə qarşı birgə mübarizəsinin vacibliyini bildirməsi deyilən məsələnin həqiqətən də, ciddi aktuallığından xəbər verir. 

Türkdilli dövlətlərin xüsusi xidmət orqanlarının prezident İlham Əliyev tərəfindən qəbul edilməsi isə Azərbaycanın bu əməkdaşlığa böyük əhəmiyyət verməsinin göstəricisidir. Çox arzu ediləndir ki, bu əməkdaşlıq real müstəvidə genişləndirilsin və gözlənilən nəticələr əldə olunsun”.

SEVDA
Versus.Az