Əfqanıstanın bu rayonları  "Taliban"dan geri alınıb

Əfqanıstan Silahlı Qüvvələri və yerli özünümüdafiə dəstələri “Taliban” qruplaşmasının silahlılarını ölkənin Taciksitanla sərhəddə yerləşən Bədəxşan əyalətinin rayonlarından çıxarıblar.

Versus.az xarici mətbuata istinadən xəbər verir ki, məlumatı Əfqanıstanın Müdafiə Nazirliyi yayıb.

Bildirilib ki, döyüşlər nəticəsində “Taliban”ın 32 silahlısı ölüb, 14-ü yaralanıb. Məlumata görə, aviasiyanın dəstəyi ilə keçirilən əməliyyat nəticəsində qruplaşmanın 4 avtomobili, silah və sursat məhv edilib.

Bundan başqa, Əfqanıstan silahlı qüvvələrinin həyata keçirdiyi hava hücumu nəticəsində “Taliban” radikal hərəkatının liderlərindən biri məhv edilib.

Bu barədə ölkənin Müdafiə Nazirliyinin “Twitter” səhifəsində məlumat yer alıb.

“Taliban”ın yüksək rütbəli komandiri Əzifə kimi də tanınan Əziz Rəhman bu gün Əfqanıstan Hərbi Hava Qüvvələrinin Lağman vilayətinə endirdiyi hava zərbəsi nəticəsində öldürülüb”, - deyə Müdafiə Nazirliyinin yaydığı açıqlamada qeyd olunub.

Bildirilir ki, o, mülki şəxslərə qarşı həyata keçirilən çox sayda terror hücumlarında iştirak edib.