Aydın Mirzəzadə: "Azərbaycan qarşı tərəfi konstruktiv münasibətlərə dəvət edir"

"Azərbaycan öz torpaqlarını Ermənistan işğalından azad etdikdən sonra Ermənistanla normal qonşuluq qurmaq istəyini ortaya qoydu. Bunun üçün iş prinsipləri irəli sürülüb, sülh müqaviləsi üzərində işlər gedir, vaxtaşırı xarici işlər nazirləri və Baş nazir səviyyəsində görüşlər keçirilir".

Versus.Az xəbər verir ki, bunu açıqlamasında Mili Məclisin deputatı  Aydın Mirzəzadə bildirib.

A.Mizəzadə eyni zamanda digər əlaqələrin də yetərincə artmaqda olduğunu deyib:

“Bütün bunlarla yanaşı, Beynəlxalq tədbirlər çərçivəsində Parlament sədrlərinin görüşü də böyük əhəmiyyət kəsb edir. Bu artıq hər iki ölkə cəmiyyətinin bir-birinə inamın artmasına, tək dövlətlərarası deyil, xalq diplomatiyası metodlarının da işə düşməsinə səbəb olur. Parlament vətəndaşlar tərəfindən seçkili bir orqandır və onun rəhbərlərinin görüşü eyni zamanda cəmiyyətin fikrinin qarşı tərəfə çatdırılmasında böyük rol oynayır. Parlament sədrləri görüşündə Milli Məclisin sədri Sahibə Qafarova Azərbaycan milli maraqlarını qətiyyətlə qoruyur. Azərbaycan sülh istəyini ortaya qoyur, erməni tərəfinin vaxtaşırı dövriyyəyə buraxdığı yalanları ifşa edir və qarşı tərəfi konstruktiv münasibətlərə dəvət edir. Və qarşıdan gələn görüşlərdə də ikitərəfli inamın artırılması üçün Azərbaycan tərəfdən müvafiq addımların atılacağını gözləmək olar.”

T.Qafarlı