Tamilla Qulami: "Qurultayın keçirilməsi üçün alternativ variantlarımız var, sadəcə o variantları son ana saxlamışıq"

“Bu il Ümid Partiyası qurultay keçirməyi planlaşdırır. Qurultay üçün bütün hazırlıq mərhələlərini keçmişik. Konfransımızı keçirməyən bir neçə rayonumuz qalıb, onlar da qısa müddət ərzində işi yekunlaşdıracaqlar”.

Versus.Az Cebhe.info-ya istinadən xəbər verir ki, bunu açıqlamasında Ümid Partiyasının sədr müavini Tamilla Qulami deyib.

T.Qulami bildirib ki, ümumilikdə qurultay keçirmək üçün üzərimizə düşən işlərin 80 faizi tamamlanıb:

“Təəssüf ki, yer üçün dəfələrlə Bakı Şəhər İcra Hakimiyyəti, ayrı-ayrı rayonların icra hakimiyyətlərinə müraciət etməmizə baxmayaraq, hələlik müsbət cavab ala bilməmişik. Qurultayın keçirilməsi üçün alternativ variantlarımız var, sadəcə o variantları son ana saxlamışıq. Qurultay nümayəndələrimizin sayı kifayət qədər çox olduğu üçün kiçik yerdə keçirilməsini məqsədəuyğun saymırıq”.

Qurultayda kimlərin partiya sədrliyinə namizəd olacağına da toxunan xanım siyasətçi deyib ki, partiya sədrliyinə namizədliyin önə sürülməsi qurultayın səlahiyyətində olduğu üçün müəyyənləşdirilmiş namizədi qurultay təqdim edəcək.

Qeyd edək ki, hazırda Ümid Partiyasının sədri sabiq deputat İqbal Ağazadədir.