Riyaz Sarıkahyadan Nəsir Məmmədova TƏBRİK

Prezident İlham Əliyevin sərəncamı ilə Nəsir Məmmədovun İraqa səfir təyin olunması Kərkük Türkmənelindəki qardaşlarımız tərəfindən sevinclə qarşılanıb.

Versus.az-ın xəbərinə görə, İraq Türkməneli Partiyasının başqanı Riyaz Sarıkahya diplomata təbrik məktubu ünvanlayıb və onun təyinatını məmuniyyətlə qarşıladıqlarını bildirib.

Partiya lideri versus.az-a açıqlamasında səfirin yeni fəaliyyətinin də uğurlu olacağına inamını dilə gətirib:

"Bildiyiniz kimi, biz İraq türkləri iki ölkə arasında körpü olmaq istəyirik. Səfir Nəsir Məmmədov oncəki fəaliyyəti dövründə də Kərkük Türkmənelini bir neçə dəfə ziyarət edib, türkmən ictimaiyyətinin nümayəndələri, partiya liderləri ilə görüşüb, bir sıra müzakirələr aparıb. Bu da bizdə böyük məmuniyyət hiss oyadıb. Arzu və istəklərimizi dinləyib".

Riyaz Sarıkahya ən böyük arzularından birinin Kərkükdə Azərbaycan Mədəniyyət Mərkəzinin açılması olduğunu bildirib:

"Biz hər zaman özümüzü Azərbaycandan bir parça hiss edirik. Burada mədəniyyət mərkəsinin açılması həm İraq-Azərbaycan mədəni əlaqələrinə, həm də bizim qardaşlarımızla bir-birimizi daha yaxından tanımamıza, münasibətlərimizin möhkəmləndirilməsinə bir töhfə olardı".

Ağanisə Əliqaraqızı
versus.az