Gözlə oynayan CAHİLLƏR
Cəmil Həsənov: ““Sizin arzusunda olduğunuz mükəmməl göz rənginiz olacaq” kimi reklam edilməməlidir”
Son zamanlar buynuz qişanın piqmentasiyası nəticəsində gözün rəngini dəyişmək barədə söz-söhbət gəzir.
Versus.Az xəbər verir ki, Akademik Zərifə Əliyeva adına Milli Oftalmologiya Mərkəzinin "Buynuz qişanın patologiyası və transplantasiyası" şöbəsinin elmi işçisi, Tibb üzrə fəlsəfə doktoru, cərrah-oftalmoloq Cəmil Həsənov müsahibəsində bu prosedurun nə dərəcədə dūzgün, yaxud da zərərli olduĝunu izah edib.
- Cəmil doktor, gözün rəngini dəyişən əməliyyat haqqında nə deyə bilərsiz?
- Doĝrusu, artıq bizim sahəmizdə baş verən biabırçılığı izləməyə səbrim çatmır. Eyni psevdooftalmoloqlar tərəfindən pul qazanmaq xatirinə insanlara necə yalan məlumatlar verildiyini çoxdan müşahidə edirəm. Həmişə ümid edirdim ki, xəstələr düzgün seçim edəcəklər. Amma təəssüflər olsun ki, bir çox xəstələr sadəlövhlük və məlumatsızlıq ucbatından gözdən əlil olurlar.
- Sertifikatlı buynuz qişa mütəxəssisi və 2008-ci ildən Azərbaycanda akademik Zərifə Əliyeva adına Milli Oftalmologiya Mərkəzində buynuz qişanın patologiyası ilə yaxından məşğul olan, ildə 60-dan çox buynuz qişa transplantasiyası edən bir mütəxəssis kimi buynuz qişanın piqmentasiyası nəticəsində gözün rənginin dəyişməsi xəbərini şərh edərdiniz.
- Bu prosedurdan sonra Xroniki quru göz; Ektaziyaya, bulanmaya, buynuz qişanın hidropsuna və görmə qabiliyyətinin itirilməsinə gətirib çıxaran buynuz qişanın deformasiyası; Yeridilən boyaya reaksiya kimi xroniki fotofobiya, iltihab, uveit; Buynuz qişada yeni qan damarlarının əmələ gəlməsi; Buynuz qişada çapıq və görmə itkisinə səbəb ola biləcək bakterial və ya göbələk infeksiyası; Buynuz qişada boyanın qeyri-bərabər paylanması; Boyanın gözün digər təbəqələrinə nüfuz etməsi; Miqrasiya və ya boyanın gözə daxil olması səbəbindən rəngin solması; Qlaukoma; Tam korluq kimi ağırlaşmalar baş verə bilər. Təbii ki, bu prosedur yaralanma, iltihab və ya buynuz qişanın anadangəlmə anomaliyası səbəbindən gözlərdəki anormal görünüşü (buynuz qişada bulanma və ya çapıq) aradan qaldırmaq üçün edilsə idi, sadaladığım bütün fəsadlara bəlkə də göz yummaq olardı. Amma bu sadəcə olaraq, müştərinin (gözünün patologiyası olmadığına görə bu insanlara xəstə demək olmaz-red.) gözünün rəngini dəyişmək istəməsi və israr etməsi səbəbindən edilirsə, ixtisaslı oftalmoloq tərəfindən bu, qəbuledilməzdir. Həkim ən azından bu əməliyyatın geri dönüşünün olmaması və ola biləcək ağırlaşmalar haqda ətraflı məlumat verməli, pul/qazanc xatirinə “sizin arzusunda olduğunuz mükəmməl göz rənginiz olacaq” kimi reklam etməməlidir.
- Dünya oftalmoloqları bu məsələyə necə baxırlar? Başqa ölkələrdə bu əməliyyatı keçirirlərmi?
- Dünyanın bütün oftalmoloji cəmiyyətləri “mən gözlərimin rəngini həmişəlik dəyişmək istəyirəm” səbəbi ilə aparılan bu prosedurun qəti əleyhinədir. Bu gün mavi gözlü, sabah yaşıl gözlü, ertəsi gün qəhvəyi gözlü görünmək istəyirsinizsə, kosmetik (rəngli) kontakt linzalardan istifadə edin.
İnternetdə buynuz qişanın piqmentasiyası və ağırlaşma riski haqqında çoxlu məlumat var. Təəssüf ki, internetdə göz rənginin dəyişdirilməsi ilə bağlı reklam çarxları bütün dünyada böyük populyarlıq qazanıb. Nəticələrini anlamayan insanlar pulsevən həkimlərin təklifi ilə bu son uydurmanı qəbul etməyə başladılar.
Ayəndə Dadaşova
versus.az
Xəbər lenti
Sea Breeze “World Architecture Festival 2024” SİYAHISINDA
Dünyanın ən yaxşı turizm məkanlarından birinə çevriləcək