Havada uçan akrobatlar və dünyanın ən möhtəşəm sirk şousu...

Təsəvvür edin: nəhəng camışların belində dayanan ayılar, həyatlarını təhlükəyə ataraq yüksək hündürlüklərdə fırlanan akrobatlar və inanılmaz heyvan performansları!

Versus.Az xəbər verir ki, oktyabrın 29-da Sea Breeze Resort ərazisində yerləşən Circus Sea Breeze-də yeni mövsüm start götürüb. Bu açılış “Buffalo Show” ilə yaddaşlarda əbədi qaldı.

Məşhur Sirk Oskar mükafatçısı Allahverdi İsrafilov tərəfindən hazırlanan bu unikal şou izləyiciləri valeh edib və heç vaxt unutmayacaqları təəssüratlar bəxş edib.

Ayılar və itlər camışların belində – Hələ belə bir səhnə görünməyib! Bu tamaşa əsl sirk sehrini nümayiş etdirib.

Dünyanın dörd bir yanından gələn ulduz sənətçilər – Keniyadan, Rusiyadan, Almaniyadan, Belarusdan və Ukraynadan gələn akrobatlar, kəndirbazlar, hava gimnastları, klounlar və jonglyorlar! Hər bir çıxış sirkin sərhədsiz olduğunu sübut edib, hər kəsi heyran qoyub.

Ənənəyə uyğun olaraq, şounun ilk günü valideyn himayəsindən məhrum uşaqlar, sağlamlıq imkanları məhdud olan uşaqlar, şəhid və qazi ailələrinin övladları üçün xüsusi olaraq təşkil edilib.

Qeyd edək ki, tamaşaçılar üçün rahatlığı təmin etmək məqsədilə metronun "Koroğlu" stansiyasından sirkin ərazisinə və şoudan sonra geri pulsuz avtobuslar təşkil edilib.

Ayəndə Dadaşova
versus.az