Fuad Əliyev: "Müəyyən mərhələdən sonra digər təşkilatlarla danışıqlara gedəcəyik”

"Bir neçə amil növbədənkənar parlament seçkilərinin keçirilməsinə əsas verir. Əsaslardan biri COP29 tədbirin Azərbaycanda keçirilməsidir".

Versus.Az xəbər verir ki, bunu prezidentliyə keçmiş namizəd, Müstəqil Həmkarlar Birliyinin sədri Fuad Əliyev növbədənkənar parlament seçkilərinin keçirilməsi ilə bağlı açıqlamasında bildirib.

Azərbaycan Konstitusiyasına görə, parlament seçkilərinin noyabr ayında keçirilməli olduğunu vurğulayan Fuad Əliyev qeyd edib ki, seçkilərin 2025-ci ildə keçirilməsi Konstitusiyaya zidd olardı. Onun sözlərinə görə, COP 29 tədbirini nəzərə alıb seçkiləri qabağa çəkmək heç bir ziddiyyət təşkil etmir:

"Parlament çoxluğu təşkil edən YAP bu hüquqdan istifadə edərək, təşəbbüs irəli sürərək, Prezidentə müraciət etdi. Bu çox düzgün və yeganə qanuni qərardır. Hesab edirəm ki, növbədənkənar parlament və ilin sonunda keçirilməsi nəzərdə tutulan bələdiyyə seçkiləri prezident seçkiləri kimi Azərbaycan tarixində qalacaq. Bu iki seçki prezident seçkiləri kimi Azərbaycanın bütün ərazilərində keçiriləcək”.

Hakim partiyanın bəzi dairələrdə müstəqil namizədləri dəstəkləyəcək bəyanatına gəlincə, F.Əliyev bildirib ki, Müstəqil Həmkarlar Birliyinin üzvləri seçkilərdə fərdi şəkildə, müstəqil namizəd kimi iştrak edəcəklər:

"Artıq namizədlərin siyahısı dəqiqləşdirilib. YAP və yaxud digər partiyaların dəstəyinə gəlincə, biz bu danışıqların tərəfdarıyıq. Proses indi başlanıb. Müəyyən mərhələni keçəndən sonra, biz digər təşkilatlarla danışıqlara gedəcəyik”.

AYSEL
versus.az