Millət vəkili Banqladeşin baş naziri ilə görüşüb

Nümayəndə heyəti Azərbaycan qadınlarının cəmiyyətdə rolu və Qarabağ həqiqətləri ilə bağlı məlumatlandırılıb

Millət vəkili, siyasi elmlər doktoru Qənirə Paşayeva Ümumdünya Qadın Sammiti çərçivəsində Banqladeşin baş naziri Şeyx Hasina və rəhbərlik etdiyi nümayəndə heyəti ilə görüşüb.

Versus.Az-ın məlumatına görə, görüşdə Azərbaycanla bağlı, ölkəmizin 1-ci vitse-prezidenti Mehriban Əliyeva başda olmaqla Azərbaycan qadınlarının cəmiyyətdə rolu ilə bağlı danışan Q.Paşayeva, onlara Qarabağ həqiqətləri ilə bağlı məlumatlar verib. 1 milyon azərbaycanlının, yüz minlərlə azərbaycanlı qadının Ermənistanın işğalı nəticəsində öz yurd-yuvalarından qaçqın və məcburi köçkün düşməsindən danışan millət vəkili, onların fundamental insan haqlarının bu gün də Ermənistan tərəfindən pozulmaqda davam etdiyini vurğulayıb.

Millət vəkili ölkələrimizin fəal qadınlarının əməkdaşlığının genişlənməsinin önəmindən də danışıb və fikir mübadiləsi olub.

Millət vəkili görüşün sonunda Banqladeşin baş naziri Şeyx Hasina və rəhbərlik etdiyi nümayəndə heyəti üzvlərinə Azərbaycan mədəniyyəti ilə bağlı hədiyyə və materialları təqdim edib.