Dünyada köçkünlərin sayı 59 milyonu ÖTÜB

Münaqişə və təbii fəlakətlər səbəbindən məcburi köçkünlərin sayı artıb. Belə ki, 2021-ci ildə ölkə hüdudları daxilində yaşayış yerini tərk etmək məcburiyyətində qalanların sayı 59,1 milyon nəfərə çatıb.

Versus.az xəbər verir ki, bu barədə Beynəlxalq Daxili Köç Monitorinqi Mərkəzi hesabat yayıb.

Məlumata görə, ötən il Cənubi Sahara ən çox daxili qaçqının qeydə alındığı region olub. Təkcə Efiopiyada beş milyon insan yaşayış yerini tərk edib. Bu ölkədə quraqlıq və Tiqray regionundakı hərbi münaqişə qaçqınların sayını artıran amillərdir.

Bundan əlavə, Konqo Demokratik Respublikası, Əfqanıstan və Myanmada da məcburi köçkünlərin sayında artım müşahidə olunub. Yaxın Şərq və Şimali Afrikada isə son on ilin ən aşağı göstəriciləri qeydə alınıb. Eyni zamanda, Çin, Filippin və Hindistan kimi ölkələrdə də ötən il təbii fəlakətlər insanları öz yaşayış yerlərindən didərgin salıb.

Ekspertlər Ukrayna böhranını nəzərə alaraq, bu il məcburi köçkünlərin sayının kəskin artacağını proqnozlaşdırır. Ukraynada hərbi əməliyyatlar nəticəsində bu ilin iki ayı ərzində ölkədaxili məcburi köçkünlərin sayı səkkiz milyondan çox olub.