"ABŞ iqtisadi baxımdan Azərbaycana önəm verir"
“Azərbaycan müstəqilliyini yenidən bərpa edəndən sonra iki ölkə arasında diplomatik, siyasi əlaqələr quruldu və formalaşdı. 1994-cü ildə ABŞ şirkətlərinin də qatıldığı "Əsrin Müqaviləsi"nin imzalanması bu əlaqələri yeni mərhələyə daşıdı. Bundan sonra tərəflər arasında münasibətlər çoxşaxəli hal almağa başladı”.
Versus.az xəbər verir ki, bunu politoloq Samir Hümbətov ABŞ Prezidenti Cozef Baydenin Azərbaycan Prezidenti İlham Əliyevə ünvanladığı məktubunda diqqət çəkən məqamlara münasibət bildirərkən deyib.
Politoloq hesab edir ki, burada ABŞ -ın Azərbaycan və Ermənistan arasında diplomatik təmasların intensivləşdirilməsinin bütün Qafqaz və transxəzər regionunun çiçəklənməsinə imkan verəcəyi qənaətinin önə çəkilməsi və bu anlamda Azərbaycanın sülh təşəbbüslərini dəstəkləməsi, iqtisadi, nəqliyyat və insanlararası əlaqələrin qurulmasının öz əksini tapması təsadüfi ola bilməz.
“Rusiya-Ukrayna müharibəsinin gedişi fonunda dünya enerji bazarında yaranan problemlər, Qərb, Avropanın Rusiyaya tətbiq etdiyi embarqolar nəticəsində Rusiya neft-qazının dünya bazarına çıxarılmasında problemlərin yaranması mahiyyət etibarilə enerji böhranını formalaşdırmağa başlayır. Bu da enerji qiymətlərinin qalxması ilə özünü göstərir, Avropada enerji təhlükəsizliyinə təhdid yaradır. Ona görə də, Baydenin bu məktubda Avropada və dünyada enerji təhlükəsizliyi məsələsinə toxunmasının arxasında bu səbəblər durur. Çünki Azərbaycan öz neftini Bakı-Tbilisi-Ceyhan əsas boru kəməri vasitəsi ilə Avropa və dünya bazarlarına çıxardır. Bundan başqa, TANAP-TAP layihəsi üzrə aparılan işlər Azərbaycan qazını həm Türkiyə bazarlarına, həm də Cənubi Avropanın -Yunanıstan, İtaliya daxil olmaqla 6 dövlətinə daşıyır. Bunun ümumi miqdarı 2 milyard kub metr olsa da, gələcəkdə 30 milyard kubun üzərinə çıxarılması hədəflənir. Bu, əslində mahiyyət etibarilə Avropanın enerji təhlükəsizliyinə bir töhfə verə və müəyyən mənada təsir edə bilər”.
Politoloq hesab edir ki, bu gün vəziyyət ABŞ və dünya iqtisadçıları tərəfindən belə dəyərləndirilir. Onun fikrincə, bu ABŞ-ın iqtisadi baxımdan Azərbaycana önəm verdiyinin bir göstəricisidir.
S.Hümbətovun qənaətincə, burada Azərbaycan-Ermənistan arasında diplomatik münasibətlərin qurulması, Qafqazda sülhün əldə edilməsi ilə bağlı məsələlərə toxunulması xüsusilə önəmlidir.
“ABŞ bilir ki, Azərbaycan hər zaman sülhün tərəfdarı olub və bu gün də bu tendensiyanı davam etdirir. Və burada Ermənistan-Azərbaycan münasibətlərinin normallaşması, sülhün əldə edilməsi ABŞ-ın Qafqaza olan marağının təmin olunmasına böyük dəstək ola bilər. Bayden tərəflər arasında danışıqların aparılması, iqtisadi-siyasi əməkdaşlıqların qurulması və sair məsələlər toxunmaqla onu göstərir ki, əslində ABŞ Qarabağ münaqişəsinin qısa müddət ərzində həll olunmasının tərəfdarıdır. Ona görə ki, həm transxəzər, Qafqaz regionu ilə bağlı ABŞ-ın hədəfləri, maraqları var”. (hafta.az)
Tahirə Qafarlı
Versus.az
Xəbər lenti
Azərbaycanda dəhşətli hadisə
Piyadanın meyitini onu vuran yük maşınına qoydular