“Qarabağ danışıqları “quş qoymaq” xatirinə olan söhbətlərdən o yana keçmir”

“Ərdoğanın bu istiqamətdə gördüyü işlər təqdir olunmalıdır. Amma Qarabağ məsələsinin həlli təkcə bir görüşlə baş tutan deyil”.

Bunu Versus.Az-a Türkiyə Prezidenti Rəcəb Tayyib Ərdoğanın Rusiya prezidenti Vladimir Putinlə apardığı müzakirələrin Türkiyə mətbuatında işıqlandırılması və Dağlıq Qarabağ münaqişəsi ilə bağlı irəli sürmüş olan fikirlərə açıqlamasında Klassik Xalq Cəbhəsi Partiyasının sədri Mirmahmud Mirəlioğlu bildirib. Partiya sədri vurğulayıb ki, bu cür informasiyalar Türkiyə mətbuatında indi üzə çıxsa da, bundan öncə Azərbaycan mətbuatı və politoloqları bir qədər irəli gedən məsələləri önə çıxarıblar:

““Habertürk” qəzeti Türkiyə prezidentinin görüşlə bağlı fikirlərini yayıb. Ərdoğan tərəflərin tutduğu mövqe ilə əlaqədar Putinin çox da ümidli olmadığını deyib. Əslində Ərdoğan deməli idi ki, “Putin Qarabağ münaqişəsinin həllini istəmir”.  Rusiya bu məsələni həll etmək istəmdiyi üçün proses bu cür də davam edəcək. Danışıqlarda səslənən fikirlər daimi qabardılan məsələlərdir və ortalıqda bir şey yoxdur. Qarabağ danışıqları “quş qoymaq” xatirinə olan söhbətlərdən o yana keçmir”.

Qeyd edək ki, Türkiyə və Rusiya prezidentləri arasında görüş noyabrın 13-də Soçidə keçirilib. Noyabrın 22-də isə Soçidə Rusiya, Türkiyə və İran prezidentlərinin üçtərəfli görüşü planlaşdırılır.

Ləman
Versus.Az