ALDP: “Silah satışı və qeyri-qanuni istifadəsinin qarşısı alınmalıdır”

Azərbaycan Liberal Demokrat Partiyasının (ALDP) sədri Fuad Əliyev Sədr Aparatının iclasını keçirib. İclasda ictimai-siyasi vəziyyət, partiyanın Gənclər Təşkilatı sədrinin hesabatı və bəzi təşkilati məsələlər müzakirə olunub.
Versus.Az xəbər verir ki, iclasda ictimai-siyasi vəziyyətlə bağlı bəyanat qəbul olunub. Bəyanatda deyilir:

“Son vaxtlar Azərbaycanın müxtəlif bölgələrində, xüsusilə Bakı şəhərində silahlı insedentlər baş verir. Vətəndaşlarda bu qədər qeyri-qanuni silahların olması bizi çox narahat edir. Belə ki, bəzi məmurların, biznes adamlarının ətraflarında olan “mühafizə” adı ilə silahlı dəstələrin aralarında olan mübahisələrdə qeyri-qanuni silahların işlədilməsi müşahidə olunur. Bu da ilk növbədə mülki vətəndaşların təhlükəsizliyini sual altına alır. Belə insidentlərin baş verməsi nəticəsində güllələnmə halları ilə də tez-tez rastlaşırıq”.
Bəyanatda qeyd olunur ki, bu sahədə nəzarətsizlik o həddə çatıb ki, oktyabrın 15-də Səbail RPİ-nin Əməliyyat işləri üzrə rəis müavini, polis polkovniki Axundzadə Orxan Abdulla oğlu odlu silahdan yaralanıb:

“Hər gün belə hadisələrin baş verməsi təhlükəsi bizdən də yan keçməyib. Hesab edirik ki, hüquq-mühafizə orqanları silahların satışının və qeyri-qanuni istifadəsinin qarşısını almalıdır”.

Nilufər
Versus.Az