Versus.Az xəbər verir ki, bu sözləri general Qasım Süleymaninin öldürülməsindən sonra Amerika və İran arasında yaşanan gərginliyə münasibət bildirən Müasir Müsavat Partiyasının sədri Hafiz Hacıyev deyib.

 

 

 

“Amerika demokratik bir dövlətdir və istəyir ki, dəyərlərini bütün dünyaya yaysın. Burda söhbət ondan gedir ki, Azərbaycan-İran münasibətləri həmişə normal olub və bizim də orda əlli milyona qədər soydaşımız yaşayır. Q.Süleymaninin öldürülməsi gərək Azərbaycan cəmiyyətini iki yerə bölməsin. Amerika dünyanın ən böyük güc mərkəzlərindən biridir və həmişə də öz vətəndaşlarını müdafiə edib. İran da regionda böyük bir gücdür və o da qərarlar verərkən gərək düşünüb addım atsın. Bu məsələlərdə Azərbaycan dövlətinin apardığı siyasəti həmişə dəstəkləmişik. Ona görə də düşünürəm ki, İran və Amerika atdığı addımlara görə düşünməlidir. Regionda baş verən savaşlar heç kimə xeyir verməyib və bu, gələcəkdə regionda böyük bir barıt çəlləyinə çevrilə bilər. Düşünürəm ki, hər iki dövlətin başçısı və regionda marağı olan dövlətlər çox ağıllı şəkildə düşünməlidir".

 

 

 

"Biz hər iki tərəflə qonşuluq əlaqələrimizi gücləndirməliyik. Yoxsa ki, bir tərəfə yıxılıb, ikinci tərəfi baltalamaq bizə xeyir etməz və Azərbaycan dövləti də bu məsələdə heç vaxtı kiminsə yanında olmaq siyasətini yürütməməlidir. Əsas bizim cəmiyyətimizdir və çalışmalıyıq ki, onu ikiyə bölməsinlər. Azərbaycanda bəzi qüvvələr aranı qatmaqdan ötrü Qasım Süleymaninin öldürülməsindən istifadə etmək istəyirlər. Buna qəti yol vermək olmaz.

 

Bu məsələdə hər iki dövlətin təmkin nümayiş etdirməsini arzu edirik. Arzu edərdik ki, regionda bu məsələ böyüməsin və bütün dünyanı müharibə bürüməsin.

Biz müxalif partiya olaraq düşünürük ki, Azərbaycan heç bir dövlətin daxili işinə qarışmadan buna öz fikirlərini bildirib”. /Moderator.az/