Fuad Əliyev: "Artıq iqtidar-müxalifət münasibətlərinin yeni mərhələsinə addımlamaq mümkündür"

"Dəstəyə təşəkkür bildirilməsini müsbət hal kimi qiymətləndirirəm".

Versus.Az xəbər verir ki, bunu Azərbaycan Liberal Demokrat Partiyasının (ALDP) sədri Fuad Əliyev Azadlıq Partiyasının sədri Əhməd Orucun ailəsi adından oğlu Abdul Oruclunun Azərbaycan Respublikasının Prezidenti İlham Əliyevə təşəkkür etməsinə münasibət bildirərkən deyib.

 
"Həm dövlət başçısı İlham Əliyev tərəfindən göstərilən dəstək, həm də Əhməd Orucun ailəsi tərəfindən bu dəstəyə təşəkkür bildirilməsini müsbət hal kimi qiymətləndirirəm. Bunu ancaq alqışlamaq lazımdır" deyən partiya sədri vurğuladı ki, artıq 5 aydır ki, digər bir müxalifətçi Oqtay Gülalıyevin Türkiyədə müalicə xərclərini Heydər Əliyev Fondu tərəfindən ödənilir. F.Əliyev Əhməd Oruca və Oqtay Gülalıyevə Allahdan şəfa diləyib:

"Ümumiyyətlə, son vaxtlar hakimiyyət iqtidar-müxalifət münasibətlərinin normalaşmasında bir neçə müsbət addımlar atıb. Son günlərdə iki partiyanın qeydiyyata alınması kimi addımları da qeyd etmək olar. Bu günlərdə Ali Məhkəmənin plenum iclasında iki müxalifətçiyə bəraət verilməsini də buraya aid etmək olar".

ALDP sədrinin sözlərinə görə, hakimiyyət tərəfindən edilən müsbət addımlar karantin rejimində davamlı olarsa, onda iqtidar-müxalifət münasibətlərinin yeni mərhələsinə addımlamaq mümkündür.

LƏMAN
Versus.Az