Bu, torpağı bizə Vətən etməyinin sevincidir...

TAHİRƏ QAFARLI

...Sənin üçün ağlayıram Şəhidim...

anadan, atadan, bacıdan, qardaşdan, sevgilidən, övladdan, canından da çox sevdiyin, uğrunda canını qurban edib qatıldığın torpağına qurban olum...

Sənin üçün ağlayıram, Şəhidim...

vətən sevgisi, vətən namusu, vətənin azadlıq sevdalısı, aşiqi olduğun, vətən üçün yanıb-yaxıldığın üçün. Cisminlə, ruhunla bu torpağa güc, sevgi, müqəddəslik bəxş etdiyin üçün. Bu torpağı sevdiyimizin dərin anlamını bizə dərk etdirduyin üçün...

Sənin üçün ağlayıram, Şəhidim...

gözümdən axan yaşlar, Sənin bir oğul, bir ər, bir övlad kimi əbədi gedişinin doğurduğu dərdlə deyil, əsla. Sən özün də bu anlamsızlığı qüruruna sığışdırmadın. Şəhidə yas tutulmaz, Şəhid anası, bacısı ağlamaz, başını dik tutar, dedin... amma qeyri-ixtiyari Sənə baxıram, ağlayıram, Şəhidim... bil ki, Səninlə qürurlanıram. Usanmadan vətəni hüdudsuz sevməyin, düşünmədən torpağını azad edib, düşmənə aman vermədən göstərdiyin o ləyaqətin, namusum, o şəırəf, o mənliyin, əzəmətin, möhtəşəmliyin, incə qəlbin, böyük ruhun vətən sevginin bizə bəxş etdiyi fəxarətin, qürurun təsəllisi, sevincidir bu göz yaşları... bu, torpağı bizə Vətən etməyinin sevincidir...

Sənin üçün ağlayıram, Şəhidim...

Bu azad torpağın hər qarışında Sənin izin var, qanın var, sevgin var... nərən var, düşmənə qəzəbin, bu torpağa verdiyin haqq-ədalətin hissi, hənirtisi var. Sən bizə qanınla, canınla yeni sevgili bir Vətən yaratdın. Şəhidim, Sən özün Vətən oldun bizə... Sən bu Vətənin, millətin kimliyi, mənliyi ləyaqəti, kişilik simvolu, elə Vətənin özüsən... bir toxum kimi bu torpağa səpildin. Bu millətin bağrında, bu vətənin baş ucunda elə bir ümid işığı, elə bir qəhrəmanlıq məşəli yandırdın ki, sönməz... bu, vətənə verdiyin cismin, ruhun...

Bu vətən özün kimi vətənlər doğuracaq. Sən bunu etdin Şəhidim...Sən bunu bizə yaşatdın...

Sənin üçün ağlayıram, Şəhidim...

bu göz yaşları sənə olan sonsuz sevgim, borcum, minnətdarlıq hissinin daim üzərinə çilənəcək narın çiskinidir... yenidən doğulmağının bizə yaşatdığı sevincdir...

Sənin üçün ağlayıram, Şəhidim...