Mütəllim Rəhimli: “Yaxın gələcəkdə ABŞ-ın da müdaxilə cəhdlərini görəcəyik”

Fransa Senatından sonra Milli Assambleya da "DQR"-in tanınması ilə bağlı qətnamə qəbul edib. Senatın qərarını adekvat qiymətləndirməyən diplomatiyamız onun kağız parçasından başqa bir şey olmadığını bəyan etmişdi. İndi isə prosesin təhlükəliliyini anlayaraq Fransaya nota vermək məcburiyyətində qalıb.

Versus.Az xəbər verir ki, bunu Ədalət Partiyasının sədr müavini Mütəllim Rəhimli Fransanın erməni mövqeyindən l çəkməməyi ilə bağlı açıqlamasında bildirib.

Onun sözlərinə görə, Fransa başda olmaqla bir çox Avropa ölkələrinin regiondan sıxışdırılıb çıxarılmasını sükutla qarşılamayacağı gözlənilən idi:

“Yaxın gələcəkdə ABŞ-ın da müdaxilə cəhdlərini görəcəyik. Onlar Cənubi Qafqazda strateji maraqlarından asanlıqla vaz keçməyəcəklər”.

M.Rəhimli hesab edir ki, Fransa bitərəf mövqedə dayanmadığını əyani şəkildə göstərdiyindən ATƏT-in Minsk Qrupunda nəinki həmsədrlikdən, həm də üzvülükdən uzaqlaşdırılmalıdır.

“Azərbaycan bununla bağlı qəti mövqeyini ortaya qoymayana qədər prosesin qarşısını almaq çətin olacaq. Bunu həm də indi formalaşan beynəlxalq münasibətlər sistemi də zəruri edir”. /hafta.az/

SEVDA
Versus.Az