Bu ittihamlar hakimiyyətin əlinə oynayır - ALDP BƏYANAT yaydı

Azərbaycan Liberal Demokrat Partiyasının (ALDP) sədri Fuad Əliyev Sədr Aparatının iclasını keçirib. İclasda müxalifətə müraciət qəbul olunub.

Versus.Az-ın məlumatına görə, müraciətdə deyilir:

"Azərbaycan müxalifətinin son 15 il ərzində acınacaqlı vəziyyətə düşdüyü bir zamanda müxalifət nümayəndələrinin sosial şəbəkələrdə bir-birlərinə qarşı ittihamları daha da intensivləşib. Artıq bu ittihamlar “hakimiyyətə satılıb”, “hakimiyyətin agenti” və başqa təhqirlər səviyyəsinə keçib.

ALDP müxalifətin bugünkü parçalanmış durumda olan bir vaxtda, belə ittihamları hakimiyyətin əlinə oynamaq kimi qiymətləndirir. Xüsusilə siyasi məhbuslar mövzusunda.

ALDP hesab edir ki, seçkilər yaxınlaşır və birlik nümayiş etdirib bu seçkilərə hazırlaşmaq lazımdır. Yalnız birlikdə biz bu iqtidara qalib gələ biləcəyik.

ALDP olaraq müxalifət partiyalara, QHT və müxalif fikirli soydaşlara müraciət edərək, bu ittihamlara son qoymağa və bütün müxalif qüvvələrin birliyinə çağırırıq".