Qulu Məhərrəmli: “Media İnkişafı Agentliyi mediada yeni ümidlər yaradıb”

Xəbər verildiyi kimi, Prezident İlham Əliyevin “Azərbaycan Respublikasında media sahəsində islahatların dərinləşdirilməsi haqqında” fərmanına uyğun olaraq Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) əsasında “Azərbaycan Respublikasının Medianın İnkişafı Agentliyi” publik hüquqi şəxs yaradılıb, “Azərbaycan Respublikasının Medianın İnkişafı Agentliyinin Nizamnaməsi” təsdiq edilib.

Versus.Az xəbər verir ki, məsələyə münasibət Media eksperti, professor Qulu Məhərrəmli bildirib ki, Media İnkişafı Agentliyinin (AİM) yaradılması media sahəsində gözlənilən islahatların başlanğıcıdır.

Q.Məhərrəmli bundan əvvəl medianın fəaliyyətini tənzimləyən ictimai və dövlət qurumlarının medianın inkişafına gətirib çıxartmadığını təəssüflə qeyd edib. O, bu mənada AİM-in yaranmasının mediada yeni ümidlər doğurduğunu bildirib:

“Nəzərə almaq lazımdır ki, Media İnkişafı Agentliyi birmənalı şəkildə dövlət büdcəsindən maliyyələşən  icra strukturudur. Bir qədər porodoksal səslənsə də, dünyada yazılı mətbuatın və onlayn medianın fəaliyyətini tənzimləyən ayrıca bir qurum yoxdur. Bütün hallarda belə bir tənzimləyici qurumun ortaya çıxması müsbət hadisədir”.

Q.Məhərrəmli AİM-in nizamnaməsində göstərilən müddəları medianın inkişafı baxımından normal hesab etməklə yanaşı, cəmiyyətdə yaranan narahatlığa da diqqət çəkib:

“Medianın fəaliyyətini nizamlayacaq bu qurum işini elə aparmalıdır ki, müstəqil normalar üzrə tənzimlənən, müstəqil araşdırmalar, təhlillər aparan media orqanları zərər çəkməsin. Çünki indiyə qədər də qəzetlərə maliyyə verirdilər. Qəzetlərdə gedən materalın keyfiyyəti rol oynamırdı. Hesab edirəm ki, bundan sonra cəmiyyətdə heç bir fikir yaratmayan, rezonans doğurmayan qəzetləri maliyyələşdirməyin heç bir əhəmiyyəti yoxdur. Əgər MİA-nın fəaliyyəti nəticəsində peşəkar, standartlara uyğun  keyfiyyətli materiallar yayan media qurumları yaranacaqsa, bunu alqışlamaq və təqdir eləmək lazımdır. Arzu edərdik ki, Medianın İnkişafı Agentliyinin medianın inkişafında gerçək rolu olsun”. /hafta.az/

T.Qafarlı
Versus.Az