“4 il yarımda nəsə baş vermirsə, guya 6 ayda nə dəyişəcək?”

“Seçkinin oktyabrda, yaxud apreldə keçirilməsinin xüsusi müzakirə olunmasına səbəb görmürəm. Sadəcə, 2018-ci ildə baş verəcək seçki prosesinin keçirilməsi bir az əvvələ çəkilib. Prezident seçkiləri 5 ildən bir keçirilir və istər iqtidar, istərsə də müxalifət, onların fəaliyyətində 4 il yarımda nəsə baş verməyibsə, guya 6 ayda nə dəyişəcək?”

Bunu Versus.Az-a Millət vəkili Fəzail İbrahimli Prezident seçkisinin vaxtının önə çəkilməsi və müşahidə olunan müzakirələrlə bağlı açıqlamasında bildirib. Onun sözlərinə görə, növbədənkənar seçkilər cəmiyyətin seçkiyə və onun verəcəyi səsə hər hansı formada təsir etməyəcək:

“Əgər sərəncam verilsəydi ki, seçki hardasa xarici bir ölkədə keçirilsin, o zaman buna dəyişiklik kimi baxmaq olardı. Seçki Azərbaycanda keçirilir və seçkiyə gedənlər də həmin adamlardır. Burda hər hansı fövqəltəbii hadisə görmürəm. Ona görə də dövlət başçısının belə bir sərəncam verməsi tam qanunidir”.

F.İbrahimli müxalifətin seçkinin önə çəkilməsi ilə bağlı yetərincə hazırlıq apara bilməyəcəyi təşvişinə haqq qazandırmayıb:

“Axı 5 il cəmiyyətə təqdim edəcək bir iş görə bilmədilərsə, bu 6 ayda nə edəcəkdilər? Bunlar dərsini bilməyən uşaq kimi hərəkət edirlər. İlboyu oxumur, imtahana 3 gün qalmış başlayır hazırlaşmağa və gəlir kəsilir. Sonra da şikayətlənir ki, zəhmətim hədər getdi. Seçki də bir siyasi imtahandır, ona ilboyu hazırlaşmaq lazımdır”.

Millət vəkili seçkinin önə çəkilməsində hakimiyyətdaxili ziddiyyətlərin səbəb kimi qeyd edilməsini də yersiz bəhanə adlandırıb:

“Bizə yalnız seçkinin ədalətli keçirilməsi lazımdır. Vahid namizədi olan hakimiyyətin daxilində nə baş verə bilər ki, heç nə”…

TAHİRƏ
Versus.Az