Komitə sədri aktrisanı yubileyi münasibətilə təbrik etdi

Milli Məclisin Mədəniyyət Komitəsinin sədri Qənirə Paşayeva Azərbaycanın teatr və kino aktrisası Zemfira Əbdülsəmədova ilə Mədəniyyət Komitəsində görüşüb.

Versus.Az xəbər verir ki, millət vəkili aktrisanı 60 illik yubileyi münasibəti ilə təbrik edib, ona yeni uğurlar diləyib.

Azərbaycan Milli Konservatoriyası tərkibində Respublika İncəsənət Gimnaziyasında aktyor və rejissor sənəti müəllimi, Azərbaycan Dövlət Gənc Tamaşaçılar Teatrında aktrisa olaraq çalışan sənətçinin tamaşaçıların alqışlarla qarşıladığını vurğulayan Q.Paşayeva onun iki dəfə Prezident Mükafatına layiq görülməsindən məmnunluğunu bildirib. Zemfira Əbdülsəmədovanın yeni nəsil şairlərinin şeirlərini səsləndirdiyini də xatırladan Komitə sədri, onun bədii qiraətçi kimi də sevildiyini söyləyib.

Sənətçini yubileyi və Novruz bayramı münasibətilə Mədəniyyət Komitəsi adından bir daha təbrik edən Q.Paşayeva, ona Komitənin Təbrik Məktubunu və Qarabağ motivli hədiyyələr təqdim edib.

Yubilyar görüşə, təbrikə görə Komitə sədrinə təşəkkür edib.

PƏRİ
Versus.Az