Azərbaycandan “Qızıl top”a namizəd kimi Kante göstərilib

“France Football” nəşrinin təsis etdiyi “Qızıl top” (Ballon d'Or) mükafatı üçün Azərbaycandan kimə səs verildiyi bilinib.

Versus.Az xəbər verir ki, səsvermə hüququ olan jurnalist Rasim Mövsümzadə Fransa millisinin və İngiltərənin “Çelsi” klubunun yarımmüdafiəçisi NQolo Kanteni bu ilin ən yaxşı futbolçusu saydığını açıqlayıb. O isə yekun sıralamada beşinci olub. 

Mövsümzadə ikinci sırada İtaliya millisinin və “Çelsi”nin yarımmüdafiəçisi Jorjinyonu, üçüncü pillədə Polşa yığmasının və Almaniyanın “Bayern” klubunun hücumçusu Robert Levandovskini üçüncü kimi yazdığını deyib. Çox maraqlıdır ki, həmkarımız qalib seçilən Argentina millisinin və Fransanın PSJ klubunun hücumçusu Lionel Messini beşinci kimi göstərib.

Qeyd edək ki, Lionel Messi 613 xalla birinci yeri tutub və karyerasında yeddinci dəfə bu fərdi titula yiyələnib. Robert Levandovski 580 xalla ikinci və Jorjinyo 460 xalla üçüncü yeri tutub.