Batut gimnastikası üzrə Dünya Kubokuna start verildi

Bakıda batut gimnastikası üzrə Dünya Kubokunun açılış mərasimi keçirilib.

Versus.Az xəbər verir ki, Milli Gimnastika Arenasında keçirilən tədbirdə gənclər və idman nazirinin müavini Mariana Vasileva, Beynəlxalq Gimnastina Federasiyasının Texniki Komitəsinin üzvü Tatyana Şuyska və digər şəxslər iştirak ediblər.

İlk olaraq iştirakçı ölkələrin bayraqları arenaya gətirilib. Şuyska çıxış edərək Hindistan və İran idmançılarının da bu yarışda iştirak etməsindən məmnun olduğunu bildirib

Mariana Vasileva isə bu yarış üçün Bakıya 13 ölkədən 50-yə yaxın idmançının qatıldığını bildirib. Bolqarıstanlı mütəxəssis Dünya Kubokunu açıq elan edib.

Son olaraq Azərbaycan Respublikasının Dövlət Himni səsləndirilib. Daha sonra yarışa start verilib.

Qeyd edək ki, bu gün və sabah keçiriləcək yarışda Azərbaycanı yığma komandanın üzvü Selcan Mahsudova təmsil edəcək.