“Dağlıq Qarabağ”, “Dağlıq Qarabağ münaqişəsi” və Minsk Qrupu həmsədrləri yoxdur"

Artıq “Dağlıq Qarabağ” bölgəsi, “Dağlıq Qarabağ münaqişəsi” olmadığı kimi, ATƏT-in Minsk Qrupu həmsədrləri də yoxdur. De-fakto onlar özlərini buraxıblar – ABŞ nümayəndəsi, Rusiya təmsilçisi artıq özlərini “həmsədr” kimi təqdim etmirlər. Fransa da öz nümayəndəsinin səfəri ilə bağlı Azərbaycan tərəfinə təqdim etdiyi müraciətdə “həmsədr” ifadəsini işlətməyib. Baş verən proses regiondakı vəziyyəti nə dərəcədə Azərbaycanın maraqlarının təmin olunması baxımdan münbit edir?

Fransanın və ABŞ ın nümayəndələrinin Ermənistana tam fərqli statusda səfər etməsi nəyi ifadə edir?

Siyasi şərhçi Aytən Qurbanova Versus.az-a şərhində bildirib ki, proseslərin inkişaf istiqaməti onu göstərir ki, Azərbaycan öz maraqlarını təmin etmək üçün kifayət qədər qətiyyətli addımlar atır. 10 noyabr bəyanatından sonrakı dövrdə ilk gündən etibarən Minsk qrupunun faktiki olaraq olmadığını və artıq münaqişə bitdiyi üçün heç bir halda onun vasitəçiliyinə ehtiyac olmayacağını bəyan edən Azərbaycan Respublikası, nəhayət ki, bu reallığın həmsədr dövlətlər tərəfindən də qəbul edilməsinə nail olub. Düzdür, Ermənistan tərəfi hər vəchlə Minsk Qrupunu yenidən danışıqlar prosesinə cəlb etməyə cəhd etsə də, buna nail olması qeyri-mümkündür”.

A.Qurbanovanın sözlərinə görə, artıq həmsədr ölkələr sülh danışıqalarından kənarda qalmamaq üçün yeni yaranmış reallığa uyğun olaraq öz nüməyəndələri səviyyəsində tərəflər arasında vasitəçilik etməyə çalışırlar.

“Bu yeni formatın nə qədər uğurlu olacağını gələcək göstərəcək, ancaq əminliklə deyə bilərik ki, istənilən halda Azərbaycan Respublikasının öz maraqlarını təmin etmək üçün nümayiş etdirdiyi qətiyyətli mövqe dəyişməz olaraq qalacaq. Keçmiş həmsədr ölkələrin ayrı-ayrılıqda prosesdə iştirakının uğurlu olması üçün isə əsas şərt, təbii ki, bundan sonrakı mərhələdə onların hansı səviyyədə beynəlxalq hüquqa və ədalətə əsaslanan mövqe nümayiş etdirmələrindən asılıdır”.

Ləman

Versus.az