“Konsulluqlarımızı bağlamağınız cavabsız qalmayacaq”

Rusiya Almaniyanın dörd Rusiya konsulluğunu bağlamaq qərarının cavabsız qalmayacağını bildirib.

Bu barədə Rusiya Xarici İşlər Nazirliyindən açıqlama verilib.

Açıqlamada Almaniya rəhbərliyinin ölkədəki dörd Rusiya baş konsulluğunun bağlanmasına dair qərarı xatırladılıb. Bu qərarın “qeyri-dost” addım olduğu və ikitərəfli münasibətləri pozmaq məqsədi daşıdığı vurğulanıb:

“Almaniya rəhbərliyini bir daha dayanmağa çağırırıq. Düşmənçilik siyasəti nümayiş etdirən Almaniya ikitərəfli münasibətlərin pisləşməsinə görə məsuliyyət daşıdığını başa düşməlidir. Berlinin açıq-aşkar təxribat xarakterli bu hərəkətləri cəzasız qalmayacaq”.

Almaniya Xarici İşlər Nazirliyinin sözçüsü Kristofer Burqer isə verdiyi açıqlamada Rusiyadakı  diplomatik varlıqlarını minimum səviyyədə saxlamağı hədəflədiklərini bildirib. O, noyabrın sonuna qədər üç alman konsulluğunun bağlanacağını vurğulayıb və bu səbəbdən də Almaniyada fəaliyyət göstərən Rusiya baş konsulluqlarından 4-nün fəaliyyətinin dayandırılmasına qərar verdiklərini nəzərə çatdırıb.