Partiya sədri Gözəl Bayramlı ilə görüşüb

Azərbaycan Liberal Demokrat Partiyasının (ALDP) sədri Fuad Əliyev prezidentin sonuncu əfv fərmanı ilə həbsxanadan azad olunan AXCP sədrinin müavini Gözəl Bayramlı ilə görüşüb. Gözəl Bayramlının evinə gedən ALDP-çilər onu azadlıqda görməkdən məmnun olduqlarını ifadə ediblər.

Versus.Az-ın məlumatına görə, ALDP sədri Fuad Əliyev qeyd edib ki, insan hüquq və azadlıqlarının qorunmasında qorxmadan, çəkinmədən mübariz aparan insanlardan biri də Gözəl Bayramlıdır:

"Biz sizin fəaliyyətinizi həmişə təqdir etmişik və başqalarına örnək göstərmişik. Cəmiyyətimiz Azərbaycanın demokratikləşməsində, insan haqlarının qorunmasında sizin kimi mübarizlərin təcrübəsindən yararlanmalıdır. Sizin fəaliyyətiniz Azərbaycanda söz, fikir azadlığının, insan haqlarının qorunmasına xidmət edir".

G.Bayramlı da öz növbəsində F.Əliyevə minnətdarlığını bildirib:

"Həm azadlıqda olanda, həm də həbsxanada sizin fəaliyyətiniz və mənə göstərdiyiniz diqqətdən xəbər tutmuşam. Buna görə sizə oz minnətdarlığımı və təşəkkürümü bildirirəm".

Qeyri rəsmi şəraitdə keçən görüşdə digər məsələlər də müzakirə edilib.

Qeyd edək ki, ALDP-nin Beynəlxalq İnsan Hüquqları Günü ilə bağlı partiyanın təsis etdiyi “Azadlıq Fədaisi” mükafatına ötən il G.Bayramlı layiq görülüb. Həmin vaxt G.Bayramlı həbsxanada olduğundan mükafat onun bacısı Şirin xanıma təqdim edilmişdi.

SEVDA
Versus.Az