Əlabbas Məhərrəmli: “Parçalanmanın labüdlüyü əvvəldən də hiss olunurdu və bu, baş verdi”

Son günlər siyasi cameənin ehtimallarına görə, Azərbaycan müxalif cəbhəsində yeni bir canlanmanın olacağı gözləniləndir. Hətta bir çoxları bunun artıq baş verdiyini iddia edir. Bir çoxları bunu Əli İnsanovla əlaqələndirir, bir qism isə yeni yaranan "Ümid-ADP" müttəfiqliyini önə çəkirlər. Lakin bu məsələyə yanaşmalar təbii ki, birmənalı deyil.

Siyasi ekspert Əlabbas Məhərrəmli Versus.Az-a bildirib ki, hələ ötən ilin sonlarından etibarən müxalifət düşərgəsində müəyyən canlanma var. Prosesin açıq müşahidə olunduğunu deyən ekspert məhz bu canlanmanın nəticəsində Azərbaycan Xalq Hərəkatının yarandığını qeyd edib:

“Əli İnsanovun həbsdən azadlığa buraxılması da onun ətrafında müəyyən təşkilatlanmanın başlayacağı haqda qənaətlərə əsas yaratdı. Bir qədər əvvəl isə ADP və Ümid yenidən bir araya gəlməyə qərar verib. İnsanov hələ ki, nə təşkilat, nə də fərd olaraq, meydanda deyil. Özü də müsahibəsində bildirib ki, partiyasını formalaşdırmaqla məşğuldur. ADP ilə Ümidin bundan əvvəlki əməkdaşlığını gördüyümüz üçün bu ittifaqın fövqəladə nəsə edəcəyini gözləmirəm”.

Bir qədər öncə AXH-nin parçalanacağı barədə proqnozunun gerçəkləşdiyini deyən Ə.Məhərrəmli, hazırkı prosesdə AXH və İnsanovun əməkdaşlıqla bağlı adlarının bir araya gətirilməsini hələlik mümkünsüz sayıb:

“Bəli, AXH-də parçalanmanın labüdlüyü əvvəldən də hiss olunurdu və bu, baş verdi. Parçalanmanın nədən qaynaqlanmasına dair tərəflərin öz versiyaları var və onlardan hansının haqlı olub-olmadığına qarışmaq istəmirəm. Əli İnsanov son müsahibəsindəki bəzi fikirlərə görə kəskin tənqid olundu. Onun tənqidçiləri əsasən AXH rəhbərləri olduğu üçün Hərəkatla İnsanovun ittifaqı bu an üçün mümkünsüz görünür”.

O ki, qaldı siyasi partiyaların seçkilərə hazırlığı ilə bağlı məlumatların gündəmə gətirlməsinə və növbədənkənar seçki ilə bağlı versiyalara ekspert bu məqama da birmənaı yanaşmayıb:

“Bilirsiz ki, növbədənkənar parlament seçkilərinin keçiriləcəyi haqda söhbətlər səngimir. Bu məlumatlar təkzib olunsa da, müzakirələr davam etməkdədir. İndiki şəraitdə partiyaların sırf seçki hazırlığı ilə məşğul olduqları müşahidə edilmir. Partiyalar və onların rəhbərləri gözləmə vəziyyətindədirlər. Onlar bəlkə də müəyyən hazırlıqlara başlayıblar, ancaq bu, hələ ki görünmür”.

LƏMAN
Versus.Az