Aydın Quliyev: “Polisə atılan tullantılar həm də hərbçi əskərimizə atılan tullantı deməkdir”

Həftəsonu karantin qaydalarının icrası zamanı vətəndaşların binadan onların üzərinə zibil, tullantı əşyalar atması Azərbaycan ictimaiyyətində böyük səs-küyə səbəb olub.

Versus.Az xəbər verir ki, baş verənlərə münasibət bildirən Aydın Quliyev hiddətini gizlətməyib.

Politoloq qeyd edib ki, həftəsonu karantın qaydalarının icrasına nəzarəti polislərimiz Daxili Qoşun əskərləri ilə birlikdə həyata keçirib. A.Quliyev hesab edir ki, bu halda polisə atılan tullantılar həm də hərbçi əskərimizə atılan tullantı deməkdir:

“Hansısa hikkəsinin ucbatından nadanlıq edənlərin sabah hərbçi əskərlərimizdən erməniyə qarşı döyüşlərdə şücaət ummağa üzü və haqqı olacaqmı? Bu gün küçələrdə pandemiya ilə mübarizəyə nəzarət edən polislər sabah elə həmin hərbçi əskərlərlə çiyin-çiyinə torpaq uğrunda müharibəyə getmiyəcəkmi?! 80-ci illərin sonlarından indiyədək polislər erməni təcavüzünə qarşı müharıbədə azmı şücaət göstərib?! Yaşadığı yuxarı mərtəbələrdən aşağıya "zibil qusanlar" hardan bilsinlər ki, neçə min polis şəhidimiz, neçə nəfər polis Milli Qəhrəmanımız var”.

A.Quliyev bildirib ki, Vətənin torpağının, demək həm də namusunun real müdafiə qüvvələrindən biri olan polisə bu sayaq münasibət göstərənlərin milli namusdan, qeyrətdən danışmağa haqqı ola bilməz:

“Bəllidir ki, yuxarı mərtəbələrdən "zibil qusanlar" bir-iki nəfər cahillər ola bilər. Polisin bu günlərdəki fəaliyyətinə dəstək verən ictimai qüvvə o qədər güclü və həlledicidir ki, bunun qabağında bir-iki adama heç əhəmiyyət verməmək də olardı. Ancaq bu cahil hərəkəti və əslində cinayəti kənardan görənlər də olub axı... Passiv seyrçi mövqelərdəki sükutu anlamaq olmur. Demirəm ki, o cahil "daş-qalaq" edilməli idi. Ən azı ona etdiyinin cinayət və mənəviyyatsızlıq olduğu başa salınmalı idi”.

Politoloq hesab edir ki, hansısa polis nəfərinin, ya zabitin hərəkətindən narazılıq ola bilər, ancaq narazılığın ifadə forması qanun-qayda ilə, ya da heç olmasa ədəb-ərkanla tapılmalıdır:

“Polis Azərbaycanın ən çoxsaylı nizami rəsmi mütəşəkkil qüvvəsidir. O qədər çoxsaylı ki, ölkədə polislə birbaşa bağlılığı olmayan tək-tük ailələr tapmaq olar. Tək-tək ailələr ola bilər ki, polisdə işləməyən bir kəsi olsun. Polisə qarşı kiminsə həqarəti əslində Azərbaycan ailələrinin mütləq əksəriyyətinə qarşı həqarət deməkdir”.

LƏMAN
Versus.Az