MMP: “Bu müqəddəs yolda daim Azərbaycan Prezidentinin yanındayıq”

“1993-cü ilin iyununda ölkədə yaranmış mürəkkəb ictimai-siyasi durum Azərbaycanda real vətəndaş müharibəsi təhlükəsi yaratdığı bir vaxtda həmin ayın 15-i Azərbaycan tarixinə Milli Qurtuluş Günü kimi daxil oldu və dövlətçiliyimiz yox olmaq təhlükəsindən xilas edildi”.

Versus.Az xəbər verir ki, bu barədə Müasir Müsavat Partiyasının (MMP) Mətbuat Xidmətinin xalqa ünvanladığı təbrik müraciətində bildirilib.

Bildirilib ki, Azərbaycan xalqının ümummilli lideri Heydər Əliyev öz xilaskarlıq missiyası ilə ölkəmizin müstəqilliyini qorudu, respublikada tüğyan edən ictimai-siyasi böhranı aradan qaldırdı və inkişafın təməlini qoydu:

“Bu gün respublikamızda Milli Qurtuluş günü qeyd edilir. Müasir Müsavat Partiyası olaraq bu münasibətlə Azərbaycan xalqını təbrik edirik. Biz inanırıq ki, ümummilli liderin siyasi kursunu bu gün layiqincə davam etdirən cənab Prezident İlham Əliyev dövlətimizin müstəqilliyini daim qoruyacaqdır.

MMP sədri Hafiz Hacıyev başda olmaqla, partiyanın bütün üzvləri bu müqəddəs yolda daim Azərbaycan Prezidentinin yanındadır”.

SEVDA
Versus.Az