İqbal Ağazadə: "İnanıram ki, torpaqlarımızı işğaldan azad edərkən də əsgərlərimizlə bərabər səngərdə olacaqsınız"
"Koronavirusa yoluxmuş bütün xəstələrimizə Allahdan şəfa diləyirəm. Dünyasını dəyişmiş bütün xəstələrimizin doğmalarına səbr arzulayır, Allah rəhmət etsin deyirəm".
Versus.Az xəbər verir ki, bunu "facebook" hesabında Ümid Partiyasının sədri İqbal Ağazadə yazıb.
Koronavirusla mübarizədə əməyi keçən hər kəsə təşəkkürünü ifadə edən partiya sədri bütün tibb personalı - həkimlərimiz, tibb bacılarımız, xəstə baxıcılarımız qarşısında baş əydiyini vurğulayıb:
"Dayanmadan, fasiləsiz, öz sağlamlıqlarını belə riskə atmaqdan çəkinmədən gecə-gündüz çalışan tibb personalına nə qədər təşəkkür etsək, azdır".
"Dəyərli Bəhram bəy, sizin üçün dua edirik"
İqbal Ağazadə statusunda hazırda sağlıq durumunda problem yaranan Əməkdar artist Bəhram Bağırzadəyə də xitab edib:
"Dəyərli Bəhram bəy, Sizin üçün dua edirik. Yumorunuz, gülüşünüz hamıya məlhəm olduğu kimi, inanıram ki, dualarımız da sizə məlhəm olacaq. Tez sağalın. Yolunuzu gözləyən doğmalarınızla yanaşı, sizi sevənlər də var. Biz çoxuq, lap çox. Dualarımız sizi sağlığınıza qovuşdurmağa yetəcək. Buna inanırıq".
Bir daha tibb personalına təşəkkürünü çatdıran İqbal bəy "var olun" deyib:
"İnanıram ki, sabah torpaqlarımızı işğaldan azad edərkən də əsgərlərimizlə bərabər səngərdə olacaqsınız. Virusa yoluxmuş xəstələrimiz sizə əmanətdir, onlarla yanaşı sizlərə də dua edirik. Hər birinizi bağrıma basıram!"
LƏMAN
Versus.Az
417 |
Siyasət
