"İnsanlar narazıdır, dar gün üçün saxladıqları vəsaitlər bitib"

13:06 30-07-2020 | 429 | Siyasət

Razi Nurullayev: "Azərbaycan gənclərinə ürəyim ağrıyır, işləyirlər, amma əməkhaqqı çox aşağıdır"

"Azərbaycan gənclərinə ürəyim ağrıyır. Azərbaycanda nəinki gənc nəsil, orta nəsil, yaşlılar arasında da işsizlik problemi geniş yayılıb".

Versus.Az xəbər verir ki, bunu deputat, Milli Cəbhə Partiyasının (MCP) sədri Razi Nurullayev deyib.

O, qeyd edib ki, sərt karantin rejiminə görə də iş yerləri azalıb, təşkilatlar iflas səviyyəsinə çatıb:

“Mən sərt karantin rejimini ilk günlərdən bəyənməmişəm. Hökumət sərt karantinə getməklə pandemiyanın qarşısına almağa çalışırdı. Amma daha böyük problemlər ortaya çıxdı. İnsanlar narazıdır, bütün pulları, dar gün üçün saxladıqları vəsaitlər bitib. İqtisadiyyat, turizm sıradan çıxıb. İnsanlar arasında psixoloji problemlər də çoxalır. Bu da özlüyündə gənclərin də işsizlik problemlərini artırır. Bu işin arxasında dayananlar cənab prezidentə yanlış rəy veriblər”.

Razi Nurullayev vurğulayıb ki, “pandemiya ilə də bağlı çölə çıxmayın, öləcəksiniz, cərimələyəcəyik, həbs edəcəyik” kimi qadağalarla təbliğat aparmaq olmaz:

“Kiçik, orta və böyük müəssisələr bankrot həddinə çatıbsa, işsizliklə bağlı mənzərə də qaçılmazdır. Bir müəssisənin 100 nəfər işsizi varsa, onun 80 nəfəri öz hesabına məzuniyyətə buraxılıbsa, biz necə vəziyyətin yaxşı olduğunu deyə bilərik? Azərbaycan gənclərinə ürəyim ağrıyır. İşləyirlər, amma aldıqları əməkhaqqı çox aşağıdır. İnsanların həyat keyfiyyətinin yaxşılaşdırılması üçün gəlirli, stabil iş yerləri olmalıdır. Gənclərin yarıdan çoxu daş hörür, sement qarışdırır. Yarısı Qaradağda ”KamAZ"lara daş yükləyir. Bu daşlarla da Azərbaycanı hasara bürüyürlər”.

SEVDA
Versus.Az