"Belə çıxır ki, kimsə virusdan öləcək, kimsə acından"
“26 min vakant iş yerlərinin siyahısını təqdim edin, internetdə yerləşdirin. Biz də görək niyə cəmaat təklif olunan iş yerlərindən imtina edir”.
Versus.Az xəbər verir ki, bunu Əmək və Əhalinin Sosial Müdafiəsi rəhbərliyinin “Bizim 26 mindən artıq vakant iş yerimiz var. Amma bir sıra halda vətəndaşlar bu işlərdən imtina edir, 190 manat ödənilməsini tələb edirlər” fikirlərini şərh edən Azərbaycan Liberal Demokrat Partiyasının (ALDP) sədri Fuad Əliyev deyib.
Partiya sədri Əmək və Əhalinin Sosial Müdafiəsi rəhbərliyinə müraciətlə “26 min vakant iş yerlərin siyahısını təqdim edin, internetdə yerləşdirin, biz də görək niyə cəmaat təklif olunan iş yrlərindən imtina edir. İmtina etmələrin bir səbəbi ola bilər ki, təklif olunan vakant iş yerlərində 190 manatdan aşağı maaş təklif olunur” - deyə, vurğulayıb.
Daha sonra Fuad Əliyev 190 manatın verilməməsi üçün bir mexanizm icad edildiyini qeyd edib:
“Bunlar indi sərt karantin rejimini iki həftə tətbiq edəndən sonra onu ləğv edirlər. Və deyirlər ki, iki həftəyə görə niyə 190 manat verək. Sonra bir on gün keçir, yenidən sərt karantin rejimi elan edirlər. Özü də bütün respublikada yox, bir neçə şəhər və rayonlarda. Bununla da 190 manatın 600 min yox, 150-200 min vətəndaşın alınması nəzərdə tutulur.”
Fuad Əliyev Maliyyə nazirin "Uşaq bağçalarında ərzağa qənaət etdik, elmi tədbirlər keçirmədik, 20 milyon büdcədə qaldı" dediyi fikirlərini də şərh edib:
“Məlum məsələdir ki, pandemiyaya görə məktəblər, uşaq baxçaları işləməyib və nəzərdə tutulan xərclər büdcədə qaldı. Çox yaxşı ki, bunu deyirsiz ki, qənaət edilib, bu 20 milyon “ciblərə” getməyib. Nazir sonra qeyd edir ki, büdcə gəlirləri azalıb. Azalacaq da. Ölkə üzrə minlərlə obyekt bağlıdır. Kiçik və orta biznes sahibləri vergi ödəyirdilər, az-çox büdcəyə pul gəlirdi. Operativ Qərargah yumuşalmaya qərar verdi, sms ləğv olundu. Bu bağlanan obyektlər mütləq açılmalıdır. 6 aydır ki, milyondan çox adam evdə oturub. Marketlər açıq, bazarlar işləyir. Niyə digər obyektlər bağlı olmalıdır? Toyların keçirilməsinə icazə vermirsiz, bunu başa düşdük. Bəs bu kafe və restoranlar niyə açılmır? Bu obyektlər də vergi ödəyirlər. Hələ də deyirsiz ki, payızda virusun yeni dalğası olacaq. Belə çıxır ki, bu millət qırılıb gedəcək? Kimsə virusdan öləcək, kimsə acından”.
410 |
Siyasət
