"Qurban Məmmədova qarşı olun, lakin..."

11:33 06-09-2020 | 636 | Siyasət

"Bu, gələcək munasibətlərdə aqressivliyi, qarşıdurmanı, qisası diktə edən siyasətdir"

"Bu gün Qurban Məmmədovun ailə üzvlərinin və ev əşyalarının çıxarılmasını ürək ağrısı ilə izlədim. XXI əsrdə münasibətlər sistemini tənzimləyən tək vasitə hüquqdur. Təəssüf ki, biz bunun şahidi olmuruq. Adamların siyasi mövqeyinə, yanaşmalarına görə ailə üzvlərinə sitəm etmək olmaz, zinhar olmaz..."

Versus.az xəbər verir ki, bu fikirləri Ümid Partiyasının sədri İqbal Ağazadə özünün "Facebook" hesabında paylaşıb.

İ.Ağazadə bildirib ki, bu, gələcək munasibətlərdə aqressivliyi, qarşıdurmanı, qisası diktə edən siyasətdir:

"Durun, dayanın! Ölkəmizin gələcəyini düşünün. Ataların bəyənmədiyiniz, qəbul etmədiyiniz, hətta düşmən olduğunuz mövqeyinə görə balalara bədəl ödətməyin. Qurban Məmmədovun siyasətini, dediklərini, münasibətini qəbul etməyin, ona qarşı olun, əks təbliğat aparın, lakin ailəsinə, balalarına əl uzatmayın".

İ.Ağazadə bildirib ki, ona kimin hansı mövqedə olması, hansı qruplaşmayla necə münasibət saxlaması, hansı oyunlar oynaması onsuz da bəllidir. Lakin hər bir halda hər şeyi hüquq həll etməlidir, kimlərinsə yanaşması yox:

"Qurban Məmmədov hər kəs kimi məni də öz efirində aşağılayıb, satqın çıxardıb, bəzən qeyri-etik ifadədən də çəkinməyib. Lakin bu, heç birimizə əsas vermir ki, onun əmlakı üzərində qeyri-hüquqi qərar verək, övladlarını çölə ataq. Hamıya səslənirəm! Bu münasibətlər bizi qarşıdurmaya, qisasa sürükləyir. Azərbaycan üçün, vətənimiz üçün dayanın, durun, mövqeyinizdən geri çəkilin. Unutmayın ki, 21-ci əsrdəyik..."

Versus.az