Razi Nurullayev: "Millət vəkilinə qarşı bu cür hərəkət edənlər sadə vətəndaşın başına turp əkərlər və əkirlər"

"Millət vəkilinə qarşı bu cür hərəkət edənlər, sadə vətəndaşın başına turp əkərlər və əkirlər. Onun üçün həmişə təklif vermişəm ki, bu sistem ləğv edilməlidir".

Versus.Az xəbər verir ki, bu sözləri özünün “Facebook” hesabında Milli Cəbhə Partiyasının sədri, millət vəkili Razi Nurullayev yazıb.

Dövlət Yol Polisinin əməkdaşının özbaşınalığını kəskin tənqid edən millət vəkili həmin əməkdaşın, yəni özünü Nurlan Kərimov kimi təqdim edən polisin idarə etdiyi maşının şəklini də paylaşıb.

Razi Nurullayevin paylaşımını təqdim edirik:

"Bu nömrə nişanı Dövlət Yol Polisinin maşınıdır. Yol polisi əməkdaşı özünü Kərimov Nurlan kimi təqdim etdi. Saat 22.50.

Birincisi, maşının arxasınca düşüb saxlamaq nə demək? Bandit qovur bu, yoxsa oğru? Özünü təqdim etmir. Sənəd tələb edir. Deyirəm ki, əlində planşet var, gir orada bax. Baxır.

Deyirəm mən deputatam, bu da həyat yoldaşım. Bizi niyə saxladın? Deyir ki, arxa fara yanmır axı deyəsən. Baxırıq yanır. Nömrə üzərinə düşən işıq zəifdir.

Deyir, mütləq sənəd verin. Verdik. Gedib 5 dəqiqəyə gəlir və deyir ki, rəis deyir ki, o deputatdırsa sənəd göstərsin.

Sözün və filmin sonu.

Təbii ki, bu cür tərbiyəsizləri, rüşvətxorları, onun qanacaqsız, dövlət əxlaqı olmayan komandirini də anındaca yerinə otuzdurardım. Etmədim, iç üzünü açsın deyə.

Bu kimi məmurun ən yüngül cəzası işindən it kimi qovulmasıdır. Özünün də, telefonla danışdığı komandirinin də.

Hər gün seyr edirəm və bir gün partlamalı idim. Novxanı yolunda sürücülərdən rüşvət toplayırlar. Hər gün qovhaqovdur.

Millət vəkilinə qarşı bu cür hərəkət edənlər, sadə vətəndaşın başına turp əkərlər və əkirlər.

Onun üçün həmişə təklif vermişəm ki, bu sistem ləğv edilməlidir.

Bu məsələdə, hörmətsizlik və qanunsuzluq edən polis nəfərlərinə güzəşt olmayacaq.
Gözləyirəm".

PƏRİ
Versus.Az