Versus.Az xəbər verir ki, bu sözləri bu gün Parlamentin İnsan Hüquqları Komitəsinin iclasında deputat Razi Nurullayev deyib.

 

 

 

 

"Bu gün Dağlıq-Qarabağ ətrafında xalqımızın bilmədiyi ciddi proseslər gedir və belə bir məqamda bütün siyasi qüvvələrin, bütün vətəndaşların və bütün fərqli fikirlərin həmrəyliyinə ehtiyac yaranıb. Bu gün hər kəs Qarabağ üçün canından keçməyə, siyasi ambisyasından geri çəkilməyə, büdcəni oğurlamaqdan çəkinməyə və dürüst məmur əxlaqı ortaya qoymağa hazır olmalıdır. Kim etmirsə, bizdən deyil! Həbslə, qorxu yaratmaqla, güc göstərməklə nə tənqidi azaltmaq, nə söyüşü dayandırmaq, nə də etirazları səngitmək olur. Bu zaman keçib, indi yeni formata, yeni yanaşmaya və yeni dialoqa ehtiyac var. Dediklərim həm hökumət daxilində köhnə kustar üsullarla hakimiyyətə yarınmaq və faydalanmaq yolunu tutanlara, həm də xaricdə rahat kreslolarda oturub kameralar qarşısında kin-küdurət, nifrət və qanlı inqilablara çağırış edənlərədir".

 

 

R.Nurullayev qeyd edib ki, köhnə sovet, bolşevik təfəkkürünü yenidən ölkəyə gətirmək və tətbiq etmək dövlətçiliyimizə təhdiddir:

 

 

"Hökumət daxilində bu siyasətə dəstək verənlər anlasınlar ki, onlar dövlətə, Prezidentə xidmət etmirlər, əksinə ziyan vurmaqla məşğuldurlar. Katolikdən çox, katolik olmayın, lütfən!

 

Barışmaz müxalif qüvvə adı altında xalqa demokratik mübarizə əvəzinə, söyüş, təhqir və şəxsiyyəti alçaltma dərsi keçənlər də bizdən deyil. Onlar da hakimiyyət daxilində sabotaj yolu tutanlarla bərabər, Azərbaycan insanlarının ləyaqətli yaşayışına, öz taleyinə sahib çıxmasına maneçilik edənlər və düşmən kəsilənlərdir. Hər bir siyasi mübarizənin sonunda aydın görünən bir yol olmalıdır. Siyasaət uşaq oyuncağı deyil ki, onunla oynayasan, o, saat kimi mürəkkəb bir mexanizmdir ki, gərək başı çıxanlar qurdalasın, həvəskarlar və naşılar yox".