Aqil Abbas: “Niyə biz Şuşaya Füzulidən 120 kilometr yol çəkməliyik?”

Rusiya sülhməramlıları Qarabağda nəzarət altında saxladığı ərazilərimizdə erməni terror əməliyyatlarının qarşısını ala bilmir. Son günlər terrorçuların Hadruta hücumu və nəticədə şəhidlərin olması vəziyyətin gərginliyindən xəbər verir.  Görünən odur ki, 44 günlük müharibə Azərbaycan Ordusunun qələbəsi ilə yekunlaşsa da, Qarabağ tam azad olunmayıb. Və diplomatik qələbə isə sülhməramlıların öz missiyasını doğru-düzgün icra etməsinə bağlıdır.

Versus.Az xəbər verir ki, deputat Aqil Abbas müsahibəsində maraqlı nüanslara diqqət çəkib.

- Aqil müəllim, son məlumatlara görə Hadrut ərazisindəki meşələrdə erməni diversantlara qarşı antiteror əməliyyatları aparılır. İki şəhidin olduğu, üç erməninin əsir alındığı iddia edilir. Bu məlumatlara əsaslansaq, Qarabağdakı vəziyyəti necə təhlil edərdiz?

- Qarabağda - Xocalı, Xankəndi, Xocavənd, Ağdərə və Əsgəran  bizim nəzarətimizdən kənarda qalıb. Allah qoysa əhalimiz ora köçəndən sonra vəziyyət başqa cür olacaq. Üçtərəfli bəyanata əsasən də qaçqın-köçkünlərimiz öz yerlərinə qayıtmalıdır. Bir məsələni qeyd etməliyəm. Mən Kolanlıyam. Təkcə Ağdərədə -Umudlu, Sırxavənd, Narıclı, Ballıpəyədə bizim kolanlı cammatı yaşıyır. Kolanlı camaatı ölümünə vuruşan camaatdır. Yəni onların olduğu yeri heç bir düşmən basa bilməz. O vaxt da camaatımız axıra qədər vuruşmudu. Sadəcə olaraq, vahid komandanlıq olmadı. İndi vəziyyət başqadır, xalq olaraq Ali Baş Komandanın ətrafında vahid bir güc kimi birləşmişik. Heç bir güc bu xalqın qarşısında dayana bilməz. Bir sözlə, bu gün Xocalıya xocalılar köçməlidir. Eləcə də digər rayonlardan olan vətəndaşlarımız öz yerlərinə - Stepanakertə (Xankəndi), Kərkicahana köçməlidirlər. Mən ona görə “Stepanakert”dedim ki, biz hələ o yeri silahlılardan azad etməmişik. İnşallah bu da olacaq. Azərbaycanımın hər bir yerində qanunlarımız işləyəcək. İndi Hadrutda belə bir hadisə olub, erməni silahlıları ondan əvvəl də belə cinayətlər törətmişdilər. Əsas məsələ odur ki, heç bir ölkə terrorçularla dialoqa getmir. Terrorçular məhv edilməlidir. Vəssalam! Təəssüf ki, bizim əsgərlərimiz humanistlik edib terrorçuları əsir götürüb göndərirlər Bakıya, Bakı da verir sülhməramlılara. Qarabağda olan o “əti ətimizdən, qanı qanımızdan” olan sülhməramlı var ey,  Muradov, o da göndərir “Stepanakertə”. Onlar da təzədən əlinə silah verib göndərir üstümüzə. Erməni terrorçuları merşələrdə gizlənib. PKK-nın bir döyüş taktikası var və bunu yaxşı bilirlər. Belə qüvvələr Türkiyədə də var. O qruplar meşələrdə döyüşməyi, tunel qazıb onun içində gizlənməyi yaxşı bilirlər. İnşallah onları məhv edəcəyik.

- Niyə sülhməramlılar vəziyytə nəzarət edə bilmir?

- Qarabağda sülh yaratmaq istəyən rus sülhməramlıları öz boyunlarına düşən vəzifəni yerinə yetirmirlər. Üçtərəfli bəyanatda da göstərilir ki, silahlı qüvvələr regiondan təcili olaraq çıxarılmalıdır. Amma əksinə, ruslar terrorçuları silahlandırırlar. Dünən məlum oldu ki, Ermənistandan Qarabağa hətta silah da gətirilir. Bir sözlə, sülhməramlılar öz vəzifələrini yerinə yetirmirlər. Heç buna cəhd də göstərmirlər. Çünki onlara lazımdır ki, Qarabağda konflikt olsun və bunu bəhanə edib orda qalsınlar. Amma biz də bir-iki “bayraqdar” qaldırarıq və onları tam məhv eliyərik. Məsəl var, deyir “qoy ayağıma yer eləyim, gör sənə neyləyirəm”. Darıxmayaq, qoy o yerlərimizə köçək, orda oturaq, duraq, həmin torpaqlarımızda hər işimizi möhkəmlədək, ondan sonra o sülhməramlılar da birliyimizi, gücümüzü görüb rədd olub gedəcəklər.

- Aqil müəllim, siz də qeyd etdiniz ki, müharibədən sonra da erməni terrorçularının Azərbaycanın işğaldan azad edilən rayonlarına hücumları, şəhidlər verməyimiz birinci dəfə deyil, bundan əvvəl də belə hadisələr olub. Sülhməramlıların nəzarətində olan ərazidə erməni terrorunun bu dərəcədə azğınlaşmasına səbəb və vəsilə olan nədir?

- Birincisi ona görə ki, Müdafiə Nazirliyi öz vəzifələrini yerinə yetirə bilmir. Ona görə ki, Müdafiə Nazirliyinin elə Mətbuat Xidməti var ki, dünən səhər 3:30-da olan hadisə ilə bağlı, bu gün səhər 12-də münasibət bildirir. Ona qədər də ölkə “dağılır”, sosial şəbəkələr “dağılır”...Qardaşım, Zakir Həsənov, sən də Elmar Məmmədyarov kimi evdən işləyirsən?!. Biz onu bilməliyik. Yenə də bugünkü gündə Müdafiə Nazirliyinin əleyhinə danışıb ermənini sevindirim. Gün gələr, hər yey bitər, danışarıq. Müharibə vaxtı hörmətli Zakir Həsənov cəbhə bölgəsində görünmədi. Amma Ermənistanın müdafiə naziri Xankəndiyə gəlmişdi və orda göstərişlər verirdi. Bizim müdafiə naziri Bakıda evdən işləyirdi, Allah işini avand eləsin. İndi baxıram, haralarasa gedən yardımlara, filana baxır, nə isə...

- Xocalı, Xankəndi, Xocavənd, Ağdərə və Əsgəran kimi yaşayış məntəqələrinə Azərbaycan vətəndaşlarının daxil olması niyə hələ də problemdir. Mövcud maneələrin saxlanılmasında məqsəd nədir?

- Niyə biz Şuşaya Füzulidən 120 kilometr yol çəkməliyik? Bizim Ağdamdan Şuşaya 37 kilometrdir. Və ikinci, bizim Ağdamdan Kəlbəcərə təxminən 82 kilometrdir, amma ora Murovdan yol çəkilir, niyə Ağdərədən getməməliyik? Bu faktı sizə dəqiq deyirəm: Ağdam ərazisində Xoramuz kəndi var, ermənilər yaşayır. Onlar gərək Əsgərandan gəlib, Ağdamdan keçib gedələr. Necə olur ki, ermənilərə orda şərait yaradılır və onlar Ağdamdan Xoramuza gedə bilirlər, amma mənə şərait yaratmırlar ki, Ağdamdan qısa yolla Şuşaya gedim? Ya da Ağdərədən keçib Murova gedim. Mən Murovun yollarını görmüşəm. O yollarda hər an qəza hadisəsi olur. Balaca bir asfalt yoldur, maşın hər an aşa bilər. Niyə mən ora Ağdərədən getməyim? O cümlədən mən niyə Əsgərəna keçib Xocalıma, Laçınıma getməyim? Dövlət birinci növbədə bunu həll etməlidir.

İkinci, guya Xocalıda ev tikirsən, guya infrastruktur yaradırsan,  niyə xocalılar Xocalıya köçürülməməlidir. Qardaş 30 min 40 min ermənini qaytarırsız bizim o yerlərə, qaytarın, amma bizi də öz kəndimizə qaytarın. Bizim cammatımız ora qayıtmaq üçün ölürlər.

- Niyə bizə o imkan yaradılmır?

- Qoy bir ayağımıza yer eliyək, sonra bu da olacaq. Elçibəy demiş, hər şeyin zamana ehtiyacı var.

- Fransanın iştirakı ilə ATƏT-in Minsk Qrupunun bərpası yenidən bərpa oluna bilərmi?

- Makron kimdi. Parlamentdə dedim. Deputatlar dedi ki, Fransa ATƏT-in Minsk Qrupundan çıxmalıdır. Mən də dedim ki,  ATƏT yoxdur, gorbagor olub. İndi həmcinslərə evlənməyə icazə verən ölkədir də, qoy deyir desin. Nə bilim vallah, ayrı cür danışardım, daha danışmıram. Prezident də dedi, ATƏT yoxdur, cəhənnəmə gora gedib.

- 44 günlük müharibə qələbə ilə bitsə də, Rusiya sülhməramlılarının nəzarətində olan regionda göründüyü kimi vəziyyət gərgin olaraq qalır. İkinci vətən müharibəsi başlaya bilərmi?

- Müharibə olmayacaq. Ən böyük ehtimalla terrorçulara qarşı əməliyyatlar aparılacaq. Terrorçu məhv edilməlidir. Terrorçu ilə danışıqların aparılması mənasızdır. Heç bir ölkə bizim antiterror əməliyyatları aparmağımıza qarışa bilməz. /hafta.az/

T.Qafarlı
Versus.Az