Ramiyə Məmmədova: “ABŞ Departamenti Azərbaycana qarşı haqsızlıq mövqeyində dayanır”

“ABŞ Dövlət Departamentinin Azərbaycanla bağlı hazırladığı bu hesabat qərəzlidir. ABŞ-da dövlət başçısı yeni seçilib və yeni siyasi kurs sərgilənir ki, burada erməni lobbiçiliyinin rolu görünür”.

Bunu Versus.Az-a ABŞ Dövlət Departamentinin Azərbaycana qarşı hazırladığı qərəzli hesabatla bağlı açıqlamasında politoloq Ramiyə Məmmədova bildirib.

Politoloqun fikrincə, ABŞ Departamenti insan hüquqlarının müdafiəsində yox, 5-3 qəpiyə satılaraq Azərbaycana qarşı haqsızlıq mövqeyində dayanır:

“Sual olunur: 44 günlük müharibədə öz torpaqlarını işğaldan azad etmək üçün mübarizəyə qalxan Azərbaycan ordusu nəyi yanlış edib? Hansı məhdudlaşma və qətllərdən söz gedir?  Qadağan olunmuş silahlardan istifadə edərək Gəncəyə, Bərdəyə raket zərbələri endirən Ermənistan niyə qınanmır? Ermənistan baş naziri özü də etiraf etdi ki, Azərbaycana "isgəndər" tipli raketlər atıblar. Görünən odur ki, beynəlxalq aləm haqqı görmək istəmir".

R.Məmmədova bildirib ki, Azərbaycan heç bir informasiyanı məhdudlaşdırmadan beynəlxalq hərbi qaydalara uyğun davrandı:

“Sosial şəbəkələrin bağlanması da müharibədə təhlükəsizliyin qorunması baxımından uyğun idi. Dezinformasiyaların qarşısını almaq üçün Azərbaycan məcbur idi ki, bu cür həmlələr etsin. Azərbaycan hər zaman belə haqsızlıqla, qərəzlə üzləşib. Azərbaycan öz gücü ilə bu təzyiqləri dəf edib, bundan sonra da dəf edəcək. Çünki Azərbaycan haqlıdır”.

SEVDA
Versus.Az