Hafiz Hacıyev: "Alimpaşa Məmmədovun həbsi ilə yanaşı, mülkü də əlindən alınmalıdır"

Ölkə mediasında Şəmkir Rayon İcra Hakimiyyətində əməliyyat keçirildiyi, icra başçısı Alimpaşa Məmmədovun, başçının birinci müavini, hazırkı təhsil şöbəsinin müdiri Qüdrət Əliyevin və digər vəzifəli şəxslərin saxlanıldığı haqda məlumatlar yayılıb.

Versus.Az xəbər verir ki, Müasir Müsavat Partiyasının (MMP) sədri Hafiz Hacıyev bununla bağlı açıqlamasında bildirib ki, Alimpaşa Məmmədov hər zaman Ramiz Mehdiyevin adını çəkib və ona “dədə” deyə müraciət edib.

Partiya sədrinin sözlərinə görə, Alimpaşa Məmmədov hər zaman çıxışlarında Mehdiyevin adı ilə danışıb və insanları hədələyib:

"Bundan əlavə, Alimpaşa Məmmədov rayonda boş torpaq qoymayıb və hamısını satıb. Bunun nəticəsi belə olmalı idi. Alimpaşa Məmmədovun həbsi hələ gecikib. Bu, bir neçə il öncə baş verməli idi”.

Hafiz Hacıyev əlavə edib ki, Alimpaşa Məmmədovun həbsi ilə yanaşı, mülkü də əlindən alınmalıdır:

“Bu cür insanlar Azərbaycan dövlətinə baş qaxıncıdır. Bu insanlardan canımızı qurtara bilsək, Azərbaycan normal inkişaf edəcək”. /konkret.az/

Versus.Az