Yeni rəhbərliklə yenilənmiş partiya QURULTAYA HAZIRLAŞIR

Xəbər verildiyi kimi, Azərbaycanda yeni və köhnədən qalan iki partiya birləşib. Təbii ki, bu birləşmədə yeni yaranan partiya özünü dondurub, köhnə partiyanın adı altında fəaliyyət göstərəcək. Əsas şərt kimi köhnə partiyanın uzun müddət qeydiyyatda olması götürülür. Beləki hələ ki, qeydiyyata alınmayan Yeni Yol Partiyası Ramil Hüseynovun öz təşəbbüsü ilə siyasi təşkilat olaraq Azərbaycan Dirçəliş və Tərəqqi Partiyası adı altında fəaliyyətlərini davam edəcək. Qeyd edək ki, Azərbaycan Dirçəliş və Tərəqqi Partiyası 24 iyun 1992-ci ildə dövlət qeydiyyatına alınıb. Bir sözlə, Dirçəliş və Tərəqqi Partiyası özünə yeni rəhbəri, "Yeni Yol"u seçib... 

Bu barədə Versus.az-a YYP-nın təşkilat komitəsinin sədri Ramil Hüseynov məlumat verib. Partiya sədri siyasi təşkilatların struktur olaraq, yaranan birliyini istər hər iki partiyanın ideyalarının həyata keçirilməsi, eləcə də üzvlərinin siyasi aktivliyinin artırılması baxımından səmərəli və əhəmiyyətli hesab edib.   

Partiya sədrinin məlumatına görə, artıq Dirçəliş və Tərəqqi Partiyasının qurultayının keçirilməsi ilə bağlı qərar qəbul olunub və 5 nəfərdən ibarət Təşkilat Komitəsi yaradılıb. Təşkilat komitəsinin sədri Ramil Hüseynov özü seçilib. O, bildirib ki, Dirçəliş və Tərəqqi Partiyasının növbəti qurultayı yanvarın 22-də keçiriləcək:

“Qurultayın gündəliyinə yeni sədr seçkisi və digər təşkilati məsələlər salınıb. Eyni zamanda, partiyanın nizamnamisinə müəyyən dəyişikliklər edilməklə onu müasir dövrün reallıq və tələblərinə, siyasi şəraitinə uyğunlaşdırmaq nəzərdə tutulur”.

O ki, qaldı Dirçəliş və Tərəqqi Partiyasının köhnə sədr və üzvlərinin yeniləşən partiyada hansı postları tutacaqlarına, R.Hüseynov partiyanın qurultayında bu kimi məsələlərə də aydınlıq gətiriləcəyini deyib.

LƏMAN
Versus.az