"Məgər Rövnəq Abdullayev əmək haqqı ilə dolanır?"

09:51 22-01-2022 | 794 | Siyasət

Razi Nurullayev: "Eyni suala eyni şablon cavabı verməkdən yorulmuşam"

"Eldar Həsənova 10 il iş verilir və əmlakı müsadirə edilir. Heç kimə belə tale arzulamıram. İttiham rüşvətxorluq, mənimsəmə və sui-istifadə və digər məsələlərdir. Açığı düşünürəm ki, doğru qərar deyil. Bəlkə də mənim bilmədiyim məqamlar var. Bu işlə bağlı məlumatlı olduğumu da deyə bilmərəm. Adamı heç 1 km-dən belə görməmişəm. Əgər varsa deyilsin".

Versus.Az xəbər verir ki, bu fikirləri şəxsi "facebook" hesabında Milli Cəbhə Partiyasının (MCP) sədri, deputat Razi Nurullayev bildirib.

Deputat vurğulayıb ki, milyonlarla, milyardlarla oğurlayanlar var, hələ də xeylisi vəzifədədir:

"Elə götürək, Neft şirkətini. Məgər Rövnəq Abdullayev və orada işləyən yüzlərlə vəzifəli şəxslər əmək haqqı ilə dolanır? Seabreeze-də, Bakının digər elitar məkanlarında, xaricdə ən lüks yerlərdə tikilən və alınan on milyonlarla qiyməti olan mülklər, restoranlar, zavod və fabriklər qanuni qazancla alınıb? Niyə bəziləri özlərini elə aparırlar ki, sanki əmək haqqı ilə yaşayırlar?"

Razi Nurullayev bildirib ki, səmimi mübarizə aparmaq lazımdır ki, ölkəmizi düzəldə bilək. Belə ki, ikiüzlülük, qeyri-səmimilik, yaltaqlıq bizi uçuruma aparır:

"Danışmaq və həqiqətləri çılpaq demək lazımdır ki, özümüz də ikiüzlülük burulğanına yuvarlanmayaq.

Bir gündə onlarla media nümayəndəsindən zəng gəlir, eyni suala eyni şablon cavabı verməkdən yorulmuşam. Amma heç zaman dövlətə və xalqa xidmətdən yorulmaram və yorulmayacam. Kim olursa olsun, hansı cəbhədə olursa olsun, dəxli yoxdur, artistlik, şou və yalançılıq, ifşa etməmək belə günahdır".

SEVDA
Versus.Az