“Nəzarətimizdə olmayan yolların istifadəsinin də yollarını tapacağıq”

09:54 10-09-2021 | icon 261 | Siyasət
“Nəzarətimizdə olmayan yolların istifadəsinin də yollarını tapacağıq”

“Erməni silahlılarının qaldığı ərazilərdə yolların salınmasının vaxtı deyil”

 

Azərbaycan torpaqları işğaldan azad olunandan sonra Qarabağ, Şərqi Zəngəzur iqtisadi rayonlarında həyata keçirilən infrastruktur layihələr, rayonları bir-birinə bağlayan yolların çəkilişi istiqamətində aparılan işlərin əhəmiyyəti müxtəlif aspektlərdə təhlil olunur.

 

Məlum olduğu kimi bu gün işğaldan azad olunan Qarabağ və ətraf rayonlarda 700 kilometr uzunluğunda əlavə halqa yollar çəkilib. Qarabağın dağlıq ərazisinin mənimsənilməsi, əhalinin köçürülməsi, erməni təxribatlarının qarşısının alınması baxımından Azərbaycanın öz nəzarətində olan ərazilərində belə alternativ yolların çəkilməsi təbii ki, lazımdır, mütləqdir. Bəllidir ki, yeni çəkilən Ömər Aşırımı, Şuşa və sair alernativ yollarımıza kifayət qədər maliyyə sərf olundu. 

 

 

 

 

 

“Bütün yollar Azərbaycanın nəzarətinə keçəndən sonra təmir oluna bilər”

 

Amma dağlıq ərazilərdən keçən, xüsusilə də sülhməramlıların nəzarətində alan təmirsiz yolların aqibəti necə olacaq? Rus sülhməramlılarının nəzarətində olan yollardan nə zaman istifadə edə biləcəyik?

 

Nəqliyyat eksperti Ərşad Hüseynov açıqlamasında bildirib ki, sülhməramlıların nəzarətində olan ərazilərdə yolların təmiri, yaxud o yollardan istifadə bu gün üçün məqbul görünmür.

 

Onun sözlərinə görə, birinci növbədə o ərazilərin rejimi müəyyən olunmalıdır:

 

"Bu da ondan ibarətdir ki, Azərbaycan yol inşaatı şirkətləri, mülki, hərbi, dövlət təşkilatları ora gələndən sonra o yollar çəkilməlidir. Bir sözlə, bütün yollar tam Azərbaycanın nəzarətinə keçəndən sonra təmir oluna bilər".

 

 

 

 

 

“Bu gün əsas məsələ istifadədən yox, nəzarətin təşkilindən gedə bilər”

 

Politoloq Fikrət Sadıqov bildirib ki, Azərbaycan ərazilərində yolların tikilməsi, ora nəzarətin edilməsi Azərbaycanın əsas prioritet məsələsidir və sülhməramlıların burda olması bizi narahat etməməlidir.

 

Politoloq hesab edir ki, birinci növbədə rus sülhməramlıları öz missiyalarını anlamalı və öz işləri ilə düzgün məşğul olmalıdırlar:

 

“Əgər sülhməramlılar üçün hər hansı çıxış aktuallaşarsa, onlar Azərbaycanın icazəsi və köməkliyindən istifadə edə bilərlər. Sülhməramlılar bilməlidirlər ki, onlar öz torpaqlarında deyillər, ora müvəqqəti gəliblər. Bu da o demək deyil ki, burda ev sahibliyi etməlidirlər”.

 

F.Sadıqov bildirib ki, Azərbaycan öz nəzarətində olmayan ərazilərində sülhməramlılarla razılaşdırılmış şəkildə olsa da, yollar çəkəcək:

 

“Təbii ki, burda onların müəyyən şərtləri, xahişləri də ola bilər. Biz o yolları da nəzarət altına götürəcəyik. Onlar bizim maraqlarımıza zidd olmadığı təqdirdə xahişlərini yerimə yetirməyə hazır olacağıq. Əsas məsələ odur ki, bu torpaqlar Azərbaycana məxsus ərazilərdir. Yolların çəkilməsi üçün kimdən icazə almalıyıq? O ki qaldı sülhməramlıların nəzarətində olan yolların təmir olunub onlardan necə istifadə olunmasına, hesab edirəm ki, bu gün əsas məsələ istifadədən yox, nəzarətin təşkilindən gedə bilər. Biz yollarımıza nəzarət etmli, monitorinqini aparmalıyıq. Biz nəzarətimizdə olmayan yolların istifadəsinin də yollarını tapacağıq. Ola bilər ki, burda müəyyən çətinliklər əmələ gəlsin. Amma onlar bilməlidirlər ki, sülhməramlılar daimi deyillər”.

 

 

 

 

 

"Azərbaycan Ağdərədən Kəlbəcərə gedən yolu təmir etmək fikrində deyil və..."

 

Politoloq Qabil Hüseynli açıqlamasında bildirib ki, Azərbaycanın öz nəzarətində olmayan yollardan istifadə etməsi mümkün deyil.

 

Onun sözlərinə görə, yollardan istifadə olunması məsələsindən qabaq sülhməramlıların səlahiyyətləri ilə bağlı hüquqi şərtlər işlənib hazırlanmalıdır:

 

“Sülhməramlılar haqqında siyasi qərar verilib. Amma onların hüquqi səlahiyyətləri, davranışları və bütövlükdə tabeçilik üsulları haqqında  hələ ki, əsasnamə yoxdur. Sülhməramlıların fəaliyyəti ilə bağlı  Rusiyanın təklif etdiyi əsasnamə isə bizi qane etmir. Bu səbəbdən də danışıqlar gedir. Bu kontekstdə də bu mərhələdə sülhməramlıların nəzarətində olan ərazilərdə yolların çəkilməsi və ordan istifadə olunması məsələsinin ortaya atılması tezdir. Ona görə də bu gün Azərbaycan Ağdərədən Kəlbəcərə gedən yolu təmir etmək fikrində deyil və hesab edirəm ki, buna lüzum da yoxdur”.

 

Politoloq hesab edir ki, Azərbaycan ərazi bütövlüyünün tam tanınması, suverenliyinin bütün ərazilər üzərində bərqərar olunmasından sonra bütün ərazilər üzrə təmir işlərini həyata keçirməyə davam edəcək:

 

“İndi isə işğaldan azad olunmuş və ərazinin böyük hissəsini təşkil edən yerlərdə tikinti, quraşdırma, yolsalma, infrastruktur məsələlərinə diqqət yetirilir. Sülhməramlıların nəzarəti altında olan və erməni silahlılarının qaldığı ərazilərdə yollar salınmasının hələ vaxtı deyil”. /hafta.az/

 

T.Qafarlı
Versus.Az

Xəbər lenti

InvestAZ

Ən çox oxunan xəbərlər

Xırdalan sakinlərinə ŞAD XƏBƏR

Yeni siyasi partiya təsis edildi

“Müstəqilliyimiz əbədidir” - VİDEOÇARX

Deputat şəhid ailəsinin ağır vəziyyətini ictimailəşdirdi

Müstəqilliyin Bərpası Günüdür

Azərbaycanın Ermənistana qarşı iddiası DİNLƏNİLƏCƏK

Xalq bundan sonra da dövlətçiliyin sədaqətli əsgəri olacaq

COVID-lə adi soyuqdəyməni necə FƏRQLƏNDİRİLMƏLİ?

Bir il ötdü

Beynəlxalq avtovağzalda bilet qalmaqalı

Çiyin ağrıları: səbəbləri və müalicəsi - MÜSAHİBƏ

Bu məktəb-lisey koronavirusa görə BAĞLANDI

Koronavirusla bağlı son STATİSTİKA

Sabah Moskvada Azərbaycan, Rusiya və Ermənistan İşçi Qrupunun iclası keçiriləcək

Məktəblər bağlanır?