Nizami Verdiyev: "Ermənilər cəzalandırılmayanadək bu təxribatlar davam edəcək"

“Bu hadisə ermənilərin müharibədəki məğlubiyyətlə barışmaq istəmədiklərini təsdiqləyir". 

Versus.Az xəbər verir ki, bu fikirləri Azərbaycan Liberal Demokrat Partiyasının (ALDP) Rəyasət Heyətinin katibi Nizami Verdiyev Qarabağda erməni terrorçunun azərbaycanlı hərbçilərin olduğu blokposta qumbara atmasını şərh edərkən bildirib.

Partiya funksioneri vurğulayıb ki, Rusiya sülhməramlıları hələ də regiondakı erməniləri tərksilah etməyiblər:

“Bu kimi hadisə gələcəkdə də oxşarlarının təkrar olunacağını deməyə əsas verir”.

Nizami Verdiyev hesab edib ki, düşmənə adekvat cavab verilməlidir:

“Bu birinci dəfə deyil. Son bir həftə ərzində bir neçə  dəfə təxribat cəhdi olub. Fikrimcə, antiterror əməliyyatlara başlanmasının vaxtıdır. Ermənilər cəzalandırılmayanadək bu təxribatlar davam edəcək. Ermənilər Rusiya sülhməramlılarının olduğu ərazidə özlərini istədikləri kimi aparırlar. Düşmən bundan sonra sülhməramlılar üçün də təhlükə yaradacaq”.

N.Verdiyev qeyd edib ki, bu məsələlər tezliklə həllini tapmalıdır.

SEVDA
Versus.Az