Xəstəxanadan əkizlərdən birinin oğurlanması iddiasına CAVAB

Xəbər verdiyimiz kimi, Bakıda qadın doğuş zamanı əkiz körpələrindən birinin həkim tərəfindən oğurlandığını iddia edib. Bu iddia ilə Namazova Aytən Oqtay qızı çıxış edib. 

Versus.az  xəbər verir ki, qadının şikayətçi olduğu Sabunçu rayonu 3 saylı Şəhər Klinik Xəstəxanasının direktoru Fikrət Zeynalov “Qafqazinfo”ya açıqlamasında xəstənin iddiasının əsassız olduğunu bildirib:

"Ana doğuş zamanı bir uşaq dünyaya gətirib. Guya UZİ zamanı qadının iki uşağı olduğu göstərilib. Bunu onu  kim deyib, bilmirəm. Bu, qeyri-mümkün bir şeydir".

 

Məsələ ilə bağlı xəstəxanının doğum şöbəsinin müdiri Arzu Babayeva da açıqlamasında qadının iddiasını təkzib edərək, məsələyə belə aydınlıq gətirib:

"Xəstənin dediyi məlumat yanlışdır. Onun dediyinə görə, guya xəstəxanaya çoxdöllü hamiləliklə qəbul olunub. Demək olar ki, tam açılışla doğum şöbəsinə qəbul olunub. Qadının 3 300 qram çəkidə övladı dünyaya gəlib. Doğulandan dərhal sonra uşağın diski çıxıb. Xəstəni özünə də məlumat verilib ki, sizin dediyiniz yanlışdır, çoxdöllü hamiləlik deyil. Ola bilsin ki, mexaniki səhv olsun. Bu qadın hamiləlik müddətinə nə həkimə gedib, nə də müayinədə olub. Heç hamiləlik qeydiyyatına da düşməyib. Qadın bir dəfə UZİ müayinəsindən keçib, o da böyük hamiləlik müddətində olub. Onda da ola bilər ki, exogenliyi düzgün müəyyən edə bilməsinlər".