Polad Həşimova və İlqar Mirzəyevə Milli Qəhrəman adı verildi

Prezident İlham Əliyev Azərbaycan Respublikası Silahlı Qüvvələrinin üç hərbi qulluqçusuna “Azərbaycanın Milli Qəhrəmanı” adının verilməsi haqqında Sərəncam imzalayıb.

Versus.az xəbər verir ki, onlardan ikisi bu ilin iyulunda baş verən Tovuz döyüşlərinin qəhrəmanlarıdır.

Belə ki, həmin döyüşlər zamanı igidlik göstərmiş general-mayor Polad Həşimov (ölümündən sonra)  və  polkovnik İlqar Mirzəyev (ölümündən sonra) “Azərbaycanın Milli Qəhrəmanı” adına layiq görülüb.

***

Polad Həşimov 2 yanvar 1975-ci ildə Qəbələ rayonunun Vəndam kəndində doğulub, sonra ailəsilə birgə Sumqayıt şəhirnə köçüblər.

O, Sumqayıtda məktəbi bitirib. Heydər Əliyev adına Ali Hərbi Məktəbdə təhsil alıb.

2014-cü ilin 25 iyununda Azərbaycan Prezidentinin sərəncamı ilə polkovnik-leytenant Polad İsrayıl oğlu Həşimov 3-cü dərəcəli "Vətənə xidmətə görə" ordeni ilə təltif olunub.

Polad Həşimov 2016-cı ildə aprel döyüşlərində iştirak edib. Həmin vaxt Tərtərin Talış kəndi uğrunda gedən döyüşləri aparan 1-ci Ordu Korpusunun Qərargah rəisi olub və yaralanıb.

2019-cu ilin iyununda ona general-mayor rütbəsi verilib.

2020-ci ilin iyul ayında baş verən Tovuz döyüşlərində Ermənistan Silahlı Qüvvələrinin hücum cəhdinin qarşısını alarkən qəhrəmancasına şəhid olub.

Bununla da, Polad Həşimov İsmət Qayıbov və Məhəmməd Əsədovdan sonra, 1988-ci ildən etibarən başlayan Qarabağ müharibəsində şəhid olan üçüncü Azərbaycan generalı oldu.

Ailəli idi; 3 övladı - iki oğlu, bir qızı qadigar qalıb.

Polad Həşimovun ölümü Qarabağı müharibə yolu ilə azad etmək qığılcımını bir gecənin içərisində alovlandırdı... Xalq ayağa qalxdı, birlik nümayiş etdirdi...


***

Polkovnik İlqar Mirzəyev 1973-cü il mayın 8-də Gürcüstanın Qardabani şəhərində anadan olub. 1990-ci ildə elə həmin şəhərdə orta məktəbi bitirib.

1991-ci ildə Heydər Əliyev adına Ali Hərbi Məktəbə qəbul olunub. 1995-ci ildə  Ali Hərbi Məktəbi bitirdikdən sonra leytenant rütbəsi ilə xidmətə başlayıb. 2003-2005- ci illərdə Azərbaycan Respublikası Silahlı Qüvvələrinin Hərbi Akademiyasında ixtisası üzrə təhsilini təkmilləşdirib.

Fərqli-fərqli illərdə Bakı, Gəncə, Naxçıvan, Beyləqan, Goranboy və Şəmkirdə hərbi xidmətdə olub. 2016-cı ildə Aprel döyüşləri zamanı göstərdiyi şücaət və qəhrəmanlığa görə, "Vətənə Xidmətə görə" II və III dərəcəli medalı ilə təltif olunub.

2019-cu il 23 fevral tarixində 3-cü Ordu korpusunun Artilleriya rəisi təyin olunub.

Polkovnik İlqar Mirzəyev 14 iyul 2020-ci ildə Tovuz istiqamətində baş verən döyüşlər zamanı qəhrəmancasına şəhid olub.
Bakı şəhərində, İkinci Fəxri Xiyabanda son mənzilə yola salınıb.

Ailəli idi; 1 oğlu və 1 qızı yadigar qalıb.