Məhəmməd Əsədullazadə: “Bu, Paşinyanın fantaziyasına uyğun olacaqsa..."

Ermənistan baş naziri Nikol Paşinyan ikitərəfli olaraq prezident İlham Əliyevlə görüşə hazır olduğunu elan edib.

Versus.Az xəbər verir ki, məsələni şərh edən politoloq Məhəmməd Əsədullazadə bildirib ki, belə bir görüşdə Paşinyan "status" məsələsini qaldırmasa və məsələ həmçinin 10 Noyabr və 11 Yanvar razılaşmalarının həyata keçirilməsi üzrə olarsa, Azərbaycan buna razılıq verə bilər.

“Amma, Nikol Paşinyan "öz şərtləri" ilə görüşmək istəyir. Bundan əlavə, Azərbaycan tərəfi ikitərəfli danışıqlar üçün Ermənistana ötən ay təkliflər göndərib. Və bu təkliflər yekun sülh müqaviləsinin bağlanmasına hesablanıb. Amma, Yerevan bu təklifə cavab vermədi. Absurd iddialar irəli sürdü”.

M.Əsədullazadə hesab edir ki, hazırda Paşinyanın indiki görüşmək təklifi Azərbaycanın Yerevana göndərdiyi təkliflər əsasındadırsa, baş tuta bilər:

“Amma bu, Nikol Paşinyanın öz fantaziyasına uyğun olacaqsa, Azərbaycan buna getməyəcək. Azərbaycan artıq Ermənistana ciddi şəkildə təzyiqlər etməlidir”.

Politoloq bildirib ki, Qarabağda hərbi qalibiyyətimizi diplomatik müstəvidə davam etdirmək üçün bir neçə ay ərzində əsaslı addımlar atılmadı:

“Qələbədən arxayın olub, üç tərəfli razılaşmaların yerinə yetiriləcəyini gözlədik. Vaxt getdikcə, Ermənistan tərəfi Azərbaycana beynəlxalq müstəvidə təzyiqlərin formalaşmasına gətirb çıxaran fəaliyyətə keçdi. Ermənistan tərəfi qismən buna nail olaraq, artıq üç tərəfli razılaşmaları yerinə yetirmir. Hətta Qarabağa Rusiya sülhməramlı qüvvələrin məsuliyyət zonasına yeni hərbiçilər göndərir və döyüş postları qurur.

ABŞ, Fransa, Almaniya və Rusiya Ermənistana konkret dəstək verir. Paşinyan məhz bu dəstəkdən arxayınlaşıb, əlavə şərtlərlə çıxış edir. Qərbin Azərbaycana qarşı siyasəti Ermənistan Azərbaycan məsələsində Yerevanın yanındadır. Bunun da əsas səbəbi müharibədən sonra, Qərblə siyasi əməkdaşlığı yüksək səviyyədə saxlanmadı. Rəsmi Bakı post-müharibə dövrünə uyğun olaraq siyasətini qurmalı, Qərblə siyasi əməkdaşlığı yüksək səviyyədə saxlmalı, Avropa Birliyi ilə "çərçivə" sazişini bağlamalıdır. NATO ilə əlaqələri inkişaf etdirməlidir. Artıq, Rusiya Azərbaycana qarşı dirsək göstərir. Azərbaycan Qərblə əlaqələri inkişaf etirəcəksə, Avropa İttifaqı ilə çərçivə sazinə gedərəsə, Qərb Ermənistanın irəli sürdüyü "status" məsələsinə əhəmiyyət verməyəcək”.

LƏMAN
Versus.Az