Fuad Əliyev: "Fəaliyyətimizi dayandırmamışıq"

Milli Məclisin Daxili Nizamnaməsinə əsasən, deputatların tətil müddəti avqustun 30-dək davam edir. Milli Məclisin komitə iclaslarının keçirilməsinə sentyabrın 15-dən başlanılacaq.

Versus.Az xəbər verir ki, parlamentin payız sessiyası sentyabrın 30-da başlanır və dekabrın 30-dək davam edir.

Maraqlıdır, hazırda siyasi partiyalarda vəziyyət necədir? Partiyalarda yay tətili başa çatdımı, yoxsa pandemiyaya görə karantin şəraiti hələ davam edir?

Azərbaycan Liberal Demokrat Partiyasının (ALDP) sədri Fuad Əliyev bildirib ki, artıq 10 ilə yaxındır ki, yay aylarında partiyanın ofisləri bağlı olur:

“Hər il 15 sentyabrda tam şəkildə işə başlayırıq. Həmçinin, bir ildən çoxdur ki, karantin dövrüdür. İclaslarımızı onlayn şəkildə həyata keçirməyə çalışırıq. Əgər pandemiya şərtləri dəyişilməsə, 15 sentyabrdan ofislərimizdə fəaliyyət göstərməyə davam edə bilərik. Hazırda koronavirusa yoluxma hallarında artım yaşandığı üçün bir az gözləməyə qərar vermişik. Buna baxmayaraq, daima öz işimizi davam etdirir və hər birimiz vəzifəmizi yerinə yetiririk”.

/Cebhe.info/