Dinarə Məmmədova: "Zorakılığın qarşısının alınması üçün dövlətin siyasəti olmalıdır"

Son vaxtlar qadın zorakılığı faktları cəmiyyətimizi çox narahat edir. Ekspertlər qadın zorakılığının yalnız qadının problemi olmadığını söyləyirlər. Ayrı-ayrı fərdlərin, qeyri-hökumət təşkilatlarının bu mənfi halın aradan qaldırılmasında böyük köməkliyi ola bilər.

Versus.Az xəbər verir ki, məsələyə münasibət bildirən Azərbaycan Liberal Demokrat Partiyası (ALDP) sədrinin müşaviri Dinarə Məmmədova açıqlamasında qadına yönələn zorakılığın çox vaxt cəzasız qalmasına diqqət çəkib.

D.Məmmədova vurğulayıb ki, ailədaxili zorakılıq yalnız qadının problemi deyil:

"Konstitusiya ilə ailənin qorunması üçün lazımi tədbirlərin görülməsi vəzifəsi dövlətə verilib. Buna görə də zorakılığın qarşısının alınması üçün dövlətin siyasəti olmalıdır. Əgər zokarılığın qarşısı alınmasa, zorakılıq təkrarlana bilər, bu da mənfi nəticələrə gətirib çıxarda bilər".

D.Məmmədova hesab edir ki, qadınlara qarşı belə hallar, onların haqlarını pozur və ləyaqətlərini tapdalayır. Onun sözlərinə görə, qadınlar çox vaxt ailədə gördükləri zorakılığı gizli saxlayırlar:

"Bunun səbəbi müxtəlif ola bilər: abır-həya, hədələnmə və sair. Bu da çox ağır nəticələrə gətirib çıxarır. "Zorakılığa məruz qalan qadınların fiziki, cinsi və reproduktiv sağlamlıqları pozulur. Zədə sonrası stress, depressiya kimi ruhi narahatlıqlar, intihar cəhdləri və dərmandan sui-istifadə kimi dəhşətli anlar yaşanır".

ALDP sədrinin müşaviri zorakılığın qarşısının alınması istiqamətində lazım olan tədbir və təkliflərə diqqət çəkib:

"İnsanlar arasında münasibətlər, böhran anlarında kömək edilməsi, qadın-kişi bərabərliyi mövzularında şəxslərin və cəmiyyətin maarifləndirilməsi kimi işlərə əhəmiyyət verilməlidir".

SEVDA
Versus.Az