Sizinlə fəxr edirik

Dekabrın 24-ü ölkə Prezidenti cənab İlham Əliyevin ad günüdür. Görünür, mən də çox şanslıyam ki, dünya siyasi elitasının ən görkəmli nümayəndələrindən biri olan bu şəxsiyyətin vaxtilə təhsil aldığı Moskva Dövlət Beynəlxalq Münasibətlər İnstitutunda dahi insan, ümummilli lider Heydər Əliyevin iştirakı ilə keçirilən təntənəli mərasimin iştirakçısı olmuşam. Həmin mərasimdə universitet statuslu bu ali məktəbin rektoru Anatoli Torkunovun İlham Əliyev barəsində söylədiyi yüksək fikirlərdən sonsuz fərəh hissi keçirmişəm. MDBMİ -ni qırmızı diplomla bitirəndən sonra həmin təhsil ocağında müəllimlik edən, alimlik dərəcəsi alan İlham Əliyevin dərs dediyi tələbələrin təəssüratlarını dinləməkdən gözəl nə ola bilərdi axı...

2003 Prezident seçkilərində Prezident Aparatına akkreditə olunmuş jurnalist kimi onunla bərabər Azərbaycanın bütün bölgələrini gəzmək, bu dövlət xadiminə qarşı sakinlərin sevgisini, inamını yaxından hiss etmək də olduqca gözəl hisslərdir. İlham Əliyev biz jurnalistlərə qarşı olduqca səmimi və mehriban davranır, qayğılarımızla maraqlanırdı. Qədəm qoyduğu hər rayonda onu ümumxalq məhəbbəti ilə qarşılayırdılar. Məhz bu sevginin, inamın təcəssümü olaraq, həm 2003, həm də sonrakı seçkilərdə yekdilliklə ölkə Prezidenti seçildi.

Öz xalqını sevən, daim öz xalqı ilə bir olan, onun dəstəyinə güvənən Prezidentimiz, var olun hər zaman! Xalqımız sizi çox istəyir və hər zaman da sizin dayağınızdır! İnanırıq ki, Qarabağ və erməni işğalı altında olan bütün torpaqlarımız məhz Sizin apardığınız siyasət nəticəsində çox tezliklə azad olacaq, Azərbaycan dünyanın ən inkişaf etmiş ölkəsinə çevriləcək. Biz sizinlə hər zaman fəxr edirik!

ƏMRAH FƏQANOĞLU